Arunachal-in All India Service-ah cadre hran neih phut

Arunachal Pradesh Assembly chuan Nilaini khan resolution pass-in, All India Service hrang hrangah cadre hran neih an phut.

Assembly chuan All India Service hrang hrang IAS, IPS leh IFS-ahte a hrana cadre nei tura hmalak a remti a ni. Chief Minister Pema Khandu chuan state an nihna pawh kum 30 a tling tawh tih sawiin, cadre hran neih a hun ve tawh a ni, a ti. State dang zawng chuan cadre hran an nei vek tawh nia sawiin, Arunachal chu a la nei ve lo awm chhun a ni, a ti. Hetih rual hian AGMUT (Arunachal, Goa, Mizoram leh Union Territory-te) chu ṭhiah tumna awm hriat a ni lo.

Chief minister Khandu chuan, AGMUT hnuaia an awm avangin central scheme ṭhenkhat chu a nih tur angin an kalpui thei lo tih sawiin, officer-te chuan hun rei lote hnuah an chhuahsan leh ṭhin avangin harsatna a thleng ṭhin a ni. Chung mite chuan tribal culture leh nungphung hrim hrim an man lo a, chu chuan harsatna a thlen chamchi a ni, a ti. Hemi a nih vang hian state-in hma a sawn a, a thlen tur chin a thlen theihna turin cadre hran neih a, tribal mite ngei officer neih chu a pawimawh hmasa ber a ni, a ti.

Khandu chuan central service-a cadre hran neih an phut chung chang hi Jont Cadre Authority of the Union Home Ministry-ah an thlen tur thu sawiin, November 3-ah hemi chung chang hi sawiho an phut thua sawi bawk.