India, Japan leh China-te Asian Union member nih vek hi ka duhthu sam a ni - Dalai Lama

Tibetan sakhaw puithiam Dalai Lama chuan Asian Union member-a India, Japan leh China-te an awmvek hun chu a ngahhleh thu leh, chu chu a duhthusam a nih thu a sawi.

Dalai Lama chuan, "Asian Union-a ram pathumte inchhun fin hun hi ka ngahhlel tak zet a, European Union, African Union leh Malaysia Union-te ang a, Asian Union-a India, Japan leh China-te member an nihho hun tur hi beiseinain ka thlir ṭhin a ni" a ti. Asia ram pathumte inkarah boruak ṭha a awm zel theihna turin hma lak a pawimawh thu sawiin, inlungrual taka awm chu hmasawnna leh, ram dangte pawhin an chung ennna tur a nih thua sawi.

Dalai Lam hian Thawhlehni khan Manipur a thleng a, ni thum chhung hun a hmang a ni. A cham chhung hian hmun hrang hrangah thu a sawi a ni.

City Convention Centre, Imphal-ah Nilaini khan thuthar thehdartute a kawm a, an hna pawimawh tak chu dik leh rinawm taka hlenchhuak turin a chah. Lama chuan, “Media mite hian ram siam ṭhatna turin mawhphurna sang tak in nei a, eirukna leh sualna hrang hrangte umbo a nih theih nan mipuite zirtir chu in mawphurna a ni" a ti.

Buddhist puithiam chuan, hmar-chhak-a rawl rala che ṭhin helpawlte chu an ngaihmawh awm tak zet tih sawiin, heng mite hi inremna siampui an ngai a ni, a ti. India prime minister hmasa ber Jawaharlal Nehru chungchang sawiin, kum 1959-a Tibet chungchanga India leh China-te an innghirngho khan, China sorkar chu remna zawnga inbikna neihpui tura thurawn a pek thu a sawi. Buaina chinfelna ṭha ber chu tharumthawh loh a ni a, a theih chin chinah inbikna hmanga chinfel tum hmasak ṭhin chu a pawimawh a ni, a ti. Hetih rual hian Tibet chuan China aṭangin independence tumin hma la lo a, inlak hran tumna pawh a neilo niin a sawi.

Dalai Lama hian khawvel ram hrangte chu remna zawng lo a, mahni himna leh ropuina tur an ngaihtuah tlan thu a sawi bawk.