Assam-in medical college 24 a nei thuai dawn : CM Sarma

Assam chief minister Himanta Biswa Sarma chuan an state-ah medical college 24 a nei thuai dawn tih a sawi.

Ningania IIT Guwahati-a thu a sawiah, Chief Minister chuan kum 2014 thleng khan Assam-ah medical college paruk chauh a awm tih sawiin, "Mahse BJP kaihhruai sorkar a din hnuah Diphu, Lakhimpur leh Dubhri-ah medical college pathum din belh a ni tawh a ni," a ti. Sorkar chuan medical college thar 15 dinna turin hma a la mek a, heng zinga pasarih chu sak mek an nih thu a sawi bawk.

"Medical college dang panga sak hna pawh November thla aṭangin ṭan a ni ang a, a bak pathum pawh siam thuai an ni ang," a ti.

Chief Minister chuan heng medical college sak turte hi zawhfel an nih hunah chuan an state in medical college 24 neiin, kumtin MBBS zirlai 2,700 vel an awm thei tawh dawn tih a sawi. PG seat pawh tihpun chhoh tum a ni dawn tih a sawi bawk.

Sarma chuan Ningania president Droupadi Murmu-i'n a hawn, Dhubri Medical College and Hospital-ah chuan kum khatah MBBS zirlai 100 an awm thei tih sawiin, department 24 awmin zirtirtu 111 an awm a ni, a ti. He medical college siamna atan hian Rs vbc 509.02 an seng a ni.

CM security Z-plus ah tisang
Sorkar laipui chuan Assam chief minister Himanta Biswa Sarma hnenah Z-category security a pek chu Z-plus-ah a tihsan sak tih nimin khan official-ten an sawi.

Ministry of home affairs (MHA) chuan tun hnaia security review a neihah CM Sarma hi all-India basis-a Z-plus security pek turah a telh a ni.

Z-plus security hi sorkar laipuiin mimal hnena venhimna a pek zinga a sang ber dawttu niin, Prime minister hnenah chauh pek ṭhin SPG level hnuai chiah a ni. India ram pumah Z-plus security pek mi 40 vel an awm mek a ni. Security mi leh sa 55 in vengin, an zingah hian CRPF commando-te pawh an tel a, chhun zan zawmin an veng a ni. A ṭul dan azirin vengtu zingah hian National Security Guard (NSG) commando pawh dah belh theih a ni bawk.