Manipur-a hmeichhe pawl aiawhten CM an hmu

Manipur sorkarin an state-a zu khapna dan a hman mek chu hmun ṭhenkhatah a hlip dawn a, hei hi state chhung pawl hrang hrangte chuan duh loin an dodal.

Hmeichhe pawl, Nupi Samaj aiawh mi 10-te chuan chief minister N Biren Singh hmuin, zu khapna hlih ṭhen tumna chu sut leh turin an ngen. Meeting-ah hian cabinet minister Y Khemchand Singh, Govindas Konthoujam, Nemcham Kipgen leh Awangbow Newman-te pawh an tel.

Nupi Samaj hian state sorkar chu zu khapna a hlih tum hi sut leh turin October 10 thleng kha hun an lo pe tawh a ni. Sorkarin zu zawrh dan tur chungchanga draft regulation policy a lo tihchhuah tawh pawh Nupi Samaj chuan an pawm lo tih sawiin, zu khap chu an thlawp reng dawn tih an sawi bawk. Chief Minister hnenah pawh an pawl dinna chu chiang takin an hriattir nawn leh thu an sawi a ni.