Assam map tihdanglam a thiang lo : Sonowal

Assam Chief Minister Sarbananda Sonowal chuan a kaihhruai sorkar chuan engti kawng mahin an state map tih danglam a remti dawn lo tih kar kalta Inrini khan a sawi. Chief minister Sonowal chuan, "Assam map siam dang lam tur hian sum engzata tam pawh awm se tih danglam a ni dawn chuang lo a, kan ramchin himna turin theih tawp ka chhuah zel dawn a ni" a ti. Ṭhenawm state-te nena ramri chungchanga buaina an neih ṭhin chingfel turin hma an la zel dawn tih sawiin, inbiakna pawh neih zel tum a ni, a ti. Ramri chungchanga buainawmte chu inbiakna hmanga chinfel a ṭha ber tih sawiin, mipuite chu dawhthei taka nghak turin a chah bawk.

Inrinni khan Charaideo district-a vantlang inkhawm buatsaihah he thu hi sawiin, district thar Charaideo chawi kan chu an ngaihpawimawh thu a sawi bawk. Sonowal chuan state khata cheng hnam hrang hrangte inkarah in unauna ṭah zawk a awm zel theih nana hma lak a pawimawh thu sawiin, inpumkhatna tura ṭanrual a ngai a ni, a ti. Naga hel - National Socialist Council of Nagaland - Isak-Muivah (NSCN-IM) chungchang pawh sawiin, sorkar laipui chuan inremna siampui turin kawng a dap mek zel a, remna leh muana awm se tih chu ram mipuite duhdan a ni, a ti. Sorkar laipui chuan NSCN-IM hi kum 2015 khan framework agreement a lo ziahpui tawh a, mahse inremna tluantling erawh a la awm thei rih lo a ni.

CM chuan National Register of Citizens (NRC) pawh sawi langin, Supreme Court thupek anga kalpui a nih thu a sawi. NRC-ah hian ram leilung fate dik tak chauh telh an nih theihna turin dik leh felfai thei ang bera kalpui a nih thu a sawi bawk. Assam chu ramdang mite awm lohna leh, khua leh tui dik tak te chauh awmna a nih theih nana chak taka hmalak a pawimawh a ni, a ti.

Prime Minister Narendra Modi-a chuan hmarchhak chu ram hmasawnna thlentu ni thei tura siam a tum thu sawiin, hemi atan hian scheme hrang hrang pawh duan a nih thu a sawi. Act East Policy chu dik leh felfai taka kalpui a nih chuan hmarchhakin nasa takin hma a sawn tur thu a sawi bawk.