Naga Political Issue : NPF-in sorkar laipui hmalakna thlawp

Nagaland-a rorel lai Naga People’s Front (NPF) chuan kar kalata Zirtawpni khan Central Executive Committee (CEC) an nei a, sorkar lapuiin Naga hel - National Socialist Council of Nagaland - Isak-Muivah (NSCN-IM)-te nena remna zawnga inbikna nei tura hma an lakna chu an thlawp thu an sawi.

Central Executive Committee (CEC) mee­ting hi Kohima-ah neih a ni a, chief minister hlui Dr Shurhozelie chuan a kaihhruai a ni. CEC chuan sorkar laipuiin inremna thuthlung ziak tura NSCN-IM-te inbiakna a neih­pui ṭhin chu ṭha an tih thu sawin, an hmalkna hi an thlawp tlat thu an sawi. Hetih rual hian Naga Political Issue chingfel tura Working Committee “Naga National Political Groups” (NNPGs) a din chu lawmawm an tih thu an sawi bawk. Naga politics buaina chingfel tura hmalakna reng reng chu an thlawp thu an sawi a. hetih rual hian Governor PB Acharya-a'n Dr Shurhozelie kaihhruai sorkar a ṭhiah danah thil fel tawk lo a awm tih sawiin, dan kalaha chetna a ni, an ti. Chief minister atana TR Zeliang lakluh a nih danah thil dik tawk lo a awm tih an sawi a, amah leh MLA dangte, party-in hremna apek chhan pwh dan kalha an chet vang niin, CEC thuchhuah chuan a tarlang.

Hetih lai hian Election Commission chuan rorel lai Naga Peoples’ Front (NPF) hi party election symbol chungchangah thutlukna siam turin a hriattir a, thla hnih chhung hun a pe. Nagaland-ah hian NPF chu ṭhuang hnihin a kal a, Lok Sabha MP Neipheu Rio leh Chief Minister hlui Dr Shurhozelie Liezietsu-a lamṭangte chu a hranin an awm a ni. Hemi a nih avang hian party symbol chungchangah pawh buaina a awm a, EC chuan thutlukna siam thuai turin a hriattir ta a ni. EC Senior Principal Secretary K F Wilfred chuan, party symbol chungchang hi August 17 khan Lok Sabha MP Neipheu Rio chuan EC-ah a thlen tih sawiin, bawhzui mek a ni, a ti. Hetih rual hian kum 2015-a EC-a NPF-in document an thehluhah chuan Dr Liezietsu chu NPF party president a nih thu a sawi bawk.

Nagaland hian nak­kum February khian state sssembly election a hmachhawn dawn a, hemi hma ngei hian NPF party pahnihte hi an symbol hman tur tichaing turin a hriattir a ni.