APPSC chairman Nipo Nabam-a'n banna a thehlut AP sorkarin paper leak venna tur special law siam dawn

Arunachal Pradesh Public Service Commission (APPSC) hnuaia Assistant Engineer (Civil) examination paper putru chungchangah APPSC chairman Nipo Nabam chu pawl hrang hrangten bang tura an nawr hnuah, kar liamta Zirtawpni khan banna a thehlut.

Nabam hian governor Brig (Retd) BD Mishra hnenah APPSC chairman a nihna aṭanga banna lehkha hi a thehlut a ni. A lehkha thehluhah hian APPSC-in Assistant Engineer (Civil) exam a buatsaiha thil duhawm lo tak thlengah, Commission hotu a nihna angin mawhphurhna lain banna hi a thehlut tih a sawi.

Arunachal Pradesh sorkar chuan paper leak kaihhnawihah hian APSSC official pathum chu an lo suspend tawh a, heng mite thlaktu tur hi kar liamta khan a ruat tawh bawk a ni. Suspend zingah hian APSSC secretary Jayanta Kumar Ray leh joint secretary and controller of examination Suraj Gurung pawh an tel.

Chief minister Pema Khandu chuan APPSC-in exam a buatsaiha paper leak thleng thei venna tur special law chu state sorkarin a siam dawn tih a sawi. Kar liam ta Zirtawpnia chanchinthar lakhawmtute a kawmnaah, Chief Minister chuan APPSC examination paper leak chuan mipuite a tilunghnur hle a, a bikin zirlai leh exam hmachhawn tuma inbuatsaihte rilru a tina zual a ni, a ti. Hei vang hian hetiang thil dik lo hi a thlen nawn tawh lohna turin, state sorkar chuan special cabinet meeting koin, dan siam hi an rel tih a sawi.

CM Khandu chuan cabinet chuan AAPSC bakah Arunachal Pradesh Staff Selection Board (APSSB) tan examination buatsaiha thil dik lo thleng thei venna tur, standard operating procedure (SOP) khauh tak siam a rel a ni, a ti.

AP sorkar chuan APPSC examination paper leak chungchang hi CBI chhui tir turin ngenna a lo thlen tawh bawk.