Meghalaya-a 5-star hotel hmasa ber hawng

Meghalaya state-a 5-star hotel hmasa ber, Vivanta Meghalaya, Shillong-a mi chu chief minister Conrad K Sangma chuan Zirtawpni liam ta khan a hawng.

Hotel hawnna inkhawmah hian tourism minister Sniawbhalang Dhar, Meghalaya Tourism Development Corporation (MTDC) chairman Saleng Sangma leh chief secretary D P Wahlang-te pawh an tel a ni.

Chief Minister Sangma chuan an state tana thil chhinchhiahtlak a ni tih sawiin, hotel sak hna hi kum 1986 aṭang khan thawh ṭan ni tawhin, kum tam tak hnuah zawhfel a ni thei ta a ni, a ti. Covid-19 hri lengin hna thawhte a tibuai chunga project an zo thei chu stakeholder hrang hrangte a lawmpui thu a sawi.

"Vivanta hi tumruhna lantirtu, hnathawhna kawnga harsatna hrang hrang hmachhawn chunga tlawm duh lo a, beih hram hram hlutna entirtu ṭha tak a ni. He hotel hi dawhtheihna, tumruhna leh inpekna tak tak chanchin lantirtu a ni," tiin Sangma chuan a sawi. Kum 10 chhunga India state ṭha 10 zinga Meghalaya tel tir tuma hmathlir an neih tihlawhtling tura an beih zel tur thu sawiin, tourism chu an hmathlir tihhlawhtlinna kawnga pawimawh tak a ni tih a sawi bawk.

Sangma chuan, "Tourism hi sector pawimawh tak, mi tam takin an chhawr theih a ni. Hei vang hian sorkar pawhin tourism tana ecosystem dik siam tumin hma a la mek a ni," a ti. A kaihhruai sorkar chuan accomodation leh infrastructure kalpuina turin ruahmanna te pawh a siam a, heng zingah West Garo Hills, West Jaintia Hills, East Khasi Hills, West Khasi Hills leh South West Garo Hills-a resort leh tourism infrastructure dinte pawh a tel a ni, tiin a sawi.