Manipur CM-in Chivu Chandrakirti Memorial Park a hawng

Manipur chief minister N Biren Singh chuan Churachandpur district-a Tonjang khuaa Chivu Chandrakirti Memorial Park chu kar liam ta Zirtawpni khan a hawng a, Indo-Myanmar border-a Behiang-ah Manipur Southern Cultural Centre siamna tur lungphum a phum bawk.

Chief Minister Biren Singh chuan a kaihhruai sorkar chuan Behiang chu Moreh khua ang bawkin international business hub-ah siam chhoh a tum tih sawiin, he bial tihhmasawnna tur ruahmanna tam tak a awm a ni, a ti.

Manipur Southern Cultural Centre hi cheng vaibelchhe 6 senga siam a ni dawn a, centre hi tihlen leh tihchangtlun chhoh zel tum a ni bawk.

Hmasawnna chu bial tinah rualkhai taka kalpui a ngai tih sawiin, CM chuan hnam te bik leh lian bik an awm lo a, mihring vek kan ni a, lungrual taka chengho tur kan ni, a ti.

Manipur state tihhmasawnna tura an hmalaknate chu Covid-19 hri leng vangin kum hnih chhung a khaihlak a, mahse thla ruk liam ta aṭang khan an bahlahnate hliahkhuh tumin theihtawpin hna an thawk tih a sawi.