Bangladesh-ah helten camp an nei em tih finfiah a ni lo : BSF

Hmarchhak huam­chhunga hel pawl hrang hrangten ṭehnawm ram Bangladesh-ah camp an nei nia tarlan chu Border Security Force (BSF) chuan fianfiahna awm lo a nih thu an tarlang.

BSF thuchhuah chuan, "Bangladesh-ah hian hmarchhak helten camp an nei a ni maithei e, mahse hei hi fianfiahna a awm lo a ni" an ti. BSFTripura frontier Inspector General S.R. Ojha chuan, Bangaldesh chunga helten camp an nei tih finfiahna hi engmah a awm lo a, hriattirna pawh an dawn lo thu a sawi. S.R. Ojha chuan, "Border Guards Bangladesh (BGB)-te nen kan thawhhonna a ṭha em em a, an ni nen hian beihpuite pawh kn lo thlak ho tawh a ni. Nimahsela tun thlengin camp an nei ngei em tih hi kan la finfiah bik lo"a ti.

Ojha chuan India-Bangla­desh border chu km 4,096 lai anih avangin venhimna pawh khauh taka kenkawh a harsa tih sawiin, heng zinga km 21 chu la hung loh a nih thu a sawi. Hetih rual hian km 145-ah chuan venhimna hi khauh taka kenkawh a ni, a ti.

Hetih lai hian Tripura Po­lice-te chuan Bangladesh ram chhunga helpawl hrang hrangte chuan camp 15 vel zet an nei niin an sawi a, chung zingah chuan National Liberation Front of Tripura (NLFT) pwh an tel thu an sawi. Bangladesh ram chhung, Chittagong Hill Tract leh Sylhet area-ah pawh camp hi 100 bawr vel a awm nia tarlan a ni.

India-Bangladesh border hi km 4,096 a ni a, West Bengal (2,216 km), Tripura (856 km), Meghalaya (443 km), Mizoram (318 km) leh Assam (263 km)-te'n an ri a ni.