KSU-in ILP ngai pawimawh turin CM an phût

Khasi Students' Union (KSU) chuan chief minister Conrad K Sangma leh a kaihhruai sorkar chu state chhunga railway network tihlen lam aiin, Inner Line Permit (ILP) system hman theihna tur chu ngaihtuah ṭha zawk turin an phût.

State sorkar chu education, youth leh employment chungchangte chu ngai pawimawh turin zirlai pawl chuan an ngen bawk.

KSU chuan dan loa an state-a pem luh an pung chak hle tih sawiin, ILP system hman hmaa rel tlantir a nih chuan harsatna a thuah hnih dawn a ni, an ti.

Meghalaya CM Sangma hian an state-a railway network tihlen tum duh lotute chu state sorkarin inbiakna neihpui a tum tih a lo sawi tawh a ni. Mahse KSU chuan ILP system hman a nih hma chuan sorkar chu inbiakna neihpui an tum lo tih an sawi.

KSU president Lambokstar Marngar chuan dan loa lutte venna tur ILP hi hman a nih hma chuan, KSU chuan railway project chu an dodal zel dawn tih a sawi a ni.

Bhaichung-a party-in Sikkim-ah ILP hman an duh
Sikkim-ah pawh Bhaichung Bhutia party, Hamro Sikkim Party (HSP) chuan dan loa an state-a lutte venna turin Inner Line Permit (ILP) hman ve an duh tih an sawi.

Pathiannia convention an neihah, HSP chuan an state chu ram dang nena inri a ni a, hei vang hian ram dang aṭanga dan loa pem lut eng emaw zat awmin, heng mite venna leh state leilung fate humhalhna atan ILP hi hman ve a ngai tih an sawi a ni. ILP an hman ve theih nan an party chuan hma an la zel dawn tih an sawi bawk.

Convention-a thusawitu, party hruaitute chuan Sikkim chu China, Nepal leh Bhutan ramte an inri avangin security thilah pawh ILP hman ngei hi a ṭul a, dan loa ram dang aṭanga pemlut an pun zel vangin tualchhung mite tan hnathawhna kawng thlengin harsatna an siam tawh a ni, an ti. State sorkar chu ILP hman phutna resolution pass a, sorkar lamah nawr zui turin an ti a ni.

Hmarchhak state pariat zingah Arunachal Pradesh, Manipur, Mizoram leh Nagaland state-ahte ILP hi hman mek a ni.