Sorkar laipuiin highway project atan Vbch nuai 1.45 a ruahman

Road Transport, Highways, Shipping and Water Resources Minister Gadkari chuan hmar­chhaka highway project kalpuina turin cheng vaibelchhe nuai 1.45 ruahman a nih thu a sawi.

Union Minister Nitin Gadkari chuan, "Hmarchhak state-te'n kawngpui ṭhazawk an neih ṭheihna turin sorkar laipui chuan vaibelchhe nuai 1.45 a ruahman a, hei hi kum hnih emaw kum thum chhung atan a ni ang" a ti. Project hi Special Accelerated Road Development Programme for North-East hnuiah duan a ni thu sawiin, project hi kalpui thuai beisei a ni, a ti. National Highways & Infrastructure Development Corporation Ltd din a nih tur thu a sawi bawk a, anni hian highway project hi an vil dawn tih a sawi.

Minister Gadkari chuan vaibel­chhe nuai 1.45 hi state hrang hrang tan sem chhuah a ni dawn tih sawiin, Assam tan vaibel­chhe 48,000 ruahman a ni a, an chang tam ber dawn a ni. Manipur vaibelchhe 22,000, Nagaland (vbch 20,000), Sikkim (vbch 17,000), Mizoram (vbch 12,000) leh Aruanchal Pardesh, Megha­laya leh Tripura tan cheng vaibel­chhe 8,000 ṭheuh ruahman a ni.

Sorkar laipui chuan hmar­chhakin infrastructure deve­lopment lamah hma a sawn theihna turin special project a duan thu hi puan a lo ni tawh bawk. Tun dinhmunah Ministry of Road Transport hmalaknain state eng emawzatah highway kalpui mek a nih thu tarlan a ni bawk.