Manipur hmun ṭhenkhatah tui a lian
Tun hnaa ruahsur nasa tak avangin Manipur hmun ṭhenkhatah tui a lian a, chhiatna thleng lian tham report a awm lo thung.
Thawhṭanni thleng khan hmun ṭhenkhatah tui hi a la lian a, sangha dil leh thlai chinna hmun ṭhenkhatte a chim a ni. Valley district-a chengten tuilian hi an tuar nasa a, Naharup, Urup leh Arabati khaute chuan an tuar nasa zual an ni. Hetih lai hian tuilian tuarte chuan state sorkarin a ngaihsak tawk lo nia sawiin, an lungawi loh thu an sawi. Lo neitute chuan an thlai chin, a ram an seng mekte chu tuilian hian a chim chhe nual tih sawiin, sorkar lapui aṭanga ṭanpuina pek an beisei thu an sawi.
Chief Minister N. Biren Singh chuan tuilian tuarte chu chhawmdawlna pek thuai an ni dawn tih a sawi a, lo neitute harsatna tawh hi sorkar chuan a en liam mai dawn lo a ni, a ti. Manipur-ah hian tun hnia khan ruah nasa takin a sur a, lui eng emaw zat chu hlauhawm chhhinchhiahna pelin an luang nia tarlan a ni. Lei leh inkalpawhna chhia eng emaw zat a awm thu tarlan a ni bawk.