Nagaland : Shurhozelie-a lam ṭang NPF mi leh saten lungawi lohna lantir

Nagaland-a rorel lai Naga People’s Front (NFP)-te chu ṭhuang hnihin an kal a, party president Shurhozelie Liezietsu-a lamṭangte chuan Thwhṭanni khan Civil Secretariat kawtah lungawi lohna an lantir a, mi eng emaw zat man an ni.

Chief Minister hlui Liezietsu-a lamṭangte chuan Thawhṭanni khan nawrh hi an hauihawt a, NPF MLA hel mi 36-te chu ban turin Assembly Speaker Imtiwapang Aier an phut a ni. Kuzholuzo Nienu chu NPF Legislature Party president-a dah an phut bawk a, youth wing-te chuan district thuneihtute hnenah nawrh hauihawt dilna an thehlut a ni. An dilna hi hnawl a ni a, mahse an kaltlangpui ta tho a ni. Nawrh hauihawt zinga eng emaw zat chu man an ni.

NPF party chhungah hian buaina nasa tak a awm a, party president Shurhozelie Liezietsu-a lamṭang leh, chief minister TR Zeliang-a zuitute inkarah khi nasa tak a awm a ni. Liezietsu hi NPF MLA tam zawkin an phatsan avangin chief minister a nihna aṭanga paihthlak a ni a, TR Zelaing-a chu chief minister atan lakluh zui a ni. Hei hian party chhungah buina nasa zawk a chawk chhuak a, chief minister Zeliang-a leh MLA eng emaw zat chu party thila inhnamhnawih thei lo tura sunpend an ni. Zeliang-a hi kum ruk chhung atan party aṭanga hnawhchhuah a ni.

Zeliang hi July 19 khan Chief Minister atan hian lakluh ni a, NPF MLA hel mi 36-te hian an thlawp bakah, Bharatiya Janata Party (BJP) MLA pali leh Independent MLA pasarihten an thlawp a ni. Hetihrual hian NPF party president Liezietsu-a chu by-election a hmachhawn hmain paithlak a ni a, hei vang hian a lamṭangte chu an lawm lo hle.

Lungawi lohna lantira nawrh huaihawtah hian Liezietsu pawh a inlan a, NPF MLA helte ban an niha disqualify an nih theihna tura hma lak zel a tum thu a sawi. Assembly speaker Imtiwapang Aier chuan Liezietsu lamṭangte thilphut hi tihlawhtlin ani dawn em hriat a nih loh thu sawiin, thutlukna siam a la nih loh thu a sawi. Chutihrual chuan Chief Minister T R Zeliang chu House-ah leader ala nih reng thu a sawi a, NPF hruaitu a nih thu a sawi bawk.

Nagaland assembly-ah hian member 60 an awm mek a, Liezietsu hian lamṭang mi 11 a nei a, seat khat ruak a awm mek bawk.