Manipur sorkar 4-child policy sawisel

Manipur-a BJP kaihhruai sorkarin sorkar aṭanga hamṭhatna hrang hrang dawn theihte fa pali aia tam neite tana tihtawp a tum chu eptu pawl, Congress party bakah pawl hrang hrangin an sawisel.

Chief minister N Biren Singh kaihhruaiin October 13 khan Manipur cabinet chuan sorkar hna leh, scheme hrang hranga hamṭhatna pek turah fa pali nei chin a bithliah a ni. Manipur State Population Commission din an rel bawk.

Manipur Pradesh Congress Committee vice president K.Tilotama chuan cabinet-in fa pali aia tam neite hnena sorkarin hamṭhatna a pek tihtawp a tum chu ram danpui kalphung lo leh, an dinhmun ngaihtuahsak loah a puh. Hetianga BJP sorkarin thutlukna a siam mai hi an ring phak lo tih a sawi. 4-child policy chu Right to Life palzutna lian tak a ni, a ti.

Society group, Indigenous People’s Association of Kangleipak (IPAK) pawhin he policy hi na taka sawiselin, thil awm lo tak leh, state leilung fate dinhmun tiderthawng thei tur a ni tih an sawi bawk.

IPAK chuan thuchhuah siamin, India ram chu khawvela mihring tamna ram pahnihna niin, chhiarpui neih leh hunah phei chuan mihring tam berna ram ni tura chhut a ni tawh a ni, a ti. "India ram mipuite zingah Meitei awm zat hi 0.09% chauh a la ni," tiin an state-a family planning policy lo siam chu thil tihawm lo tak a nih thu an tarlang.