Nagaland : Hornbill Festival atan inbuatsaih mek

Nagaland chuan kuminah Hornbill Festival neih tur chu kum dang zawng aia lian leh puizawkin buatsaih a tum a, hemi atan hian inbuatsaihna pawh ngawrh takin a kalpui mek.

Tourism and Art&Culture advisor H Khehovi Yepthomi chuan December 1-10 chhungin Hornbill Festival hi state khawpui, Kohima aṭanga km 12 vela hla, Naga Heritage Village, Kisama-ah neih a ni dawn tih a sawi.

Thawhṭanni khan festival neih tur atana inbuatsaihnate thlirin Yethomi hian tribal pawl hrang hrang aiawhte meeting a neihpui a ni. Yethomi chuan tribal pawlte chu Kisama-a an hnam puala bûk te (hut) an sakte chu thuam ṭha ṭan tur leh, festival tana theihtawpa inbuatsaih chho turin a chah.

Hornbill Festival hi kum 2010 aṭang khan buatsaih ṭan a ni a, kumin hi ṭum 23 an neihna tur a ni. Kum 2020 khan hri leng vangin virtual hmanga neih a ni a, ni thum chhung chauh neih a ni bawk. Nikum khan festival neih laiin Mon district-a Oting-ah security force-ten civil mi 14-te an kahhlum avangin festival pawh hi tihtawp zui a ni.

Yethomi chuan Hornbill Festival chu khawvel huap pawha hriat hlawh a ni tawh tih sawiin, Nagaland leh a mi chengte culture pholanna pawimawh tak a ni, a ti.

Festival neihna atana siam, Kisama Heritage Village hi Nagaland map anga siam niin, state chhunga tribal hnam hrang hrangte pawh an chenna bial ang zelin an awmna hmun siamsak a ni. Nagaland-ah recognised tribe hi 18 an awm mek a ni.

Hetih lai hian Nagaland aṭanga state hran phuttu, Eastern Nagaland Peoples’ Organisation (ENPO) hnuaia tribal pawl sarihte chu Thawhṭannia meeting-ah hian an tel ve duh lo a, Hornbill Festival-ah pawh tel an tum lo tih an sawi. Mahse Yepthomi chuan sorkarin ENPO hruaitute hi biain, festival lawmnaah an tel ve ngei a beisei thu a sawi.