AP : Rajiv Gandhi University VC office suasam

Arunachal Pradesh-a Rajiv Gandhi University (RGU) vice-chancellor Prof Saket Kushwaha-a chamber chu Thawhṭanni khan RGU Students' Union member-ten an suasam.

RGSSU executive member-te chu Thawh­ṭanni chawhma dar 11 vel khan VC Secretariat-ah varsity-a harsatna an neih chungchangte sawipui turin an kal a, hostel prefect system siamthar leh tura an ngenna VC hian a lo dawnsawn ṭhat loh avangin an lungawi loin office hi an suasam zui ta nia sawi a ni. RGU thuneitute chuan he thil thleng vang hian FIR an thehlut zui bawk.

University-a public relations officer (PRO) chuan thuchhuah siamin, zirlaite chetna avang hian Prof Kushwaha leh a security officer-te chuan hliam an tuar niin a sawi. PRO thuchhuah chuan, "RGUSU member ṭhenkhat chu VC chamber-a kawngkhar tichhiain an lut a, office chhungah furniture leh hmanraw dang awmte an suasam zui a ni," a ti.

Hostel prefect system kalpui leh tura an ngenna chu ngaihtuah mek a ni tih PRO chuan a sawi a, academic council lamin an sawiho leh an pawm a ngai a ni, tiin an sawi.