Supreme Court-in Tripura sorkar hun pawhsei sak

Supreme Court chuan Tripura sorkarin non-teaching staff 12,000 a lak chungchanga insawifiah tura hun a pek chu, nakum Janury thla thleng insawifiah turin hun a pawhsei sak.

Justices Adarsh Kumar Goel leh Uday Umesh Lalit-te chuan hun pawhsei sak an nih thu hi Thawhlehni khan an puang a, January 2018-ah court-a state sorkar aiawh inlan tura hriattirna chhuah a nih thu an sawi. Left Front sorkar hian non-teaching staff 12,000 a la a, hemi chungchangah hian petition thehluh a ni a, SC chuan sorkar chu insawifiah tur leh, hnalak tawh sa cancel a, a bul aṭanga hnalak kalpui leh turin a hriattir a ni. Education Minister Tapan Chakraborty chuan, apex court chuan hemi chung changah hian October 4 khan hriattirna a lo chhuah tawh tih sawiin, final hearing neih anih hma chuan heng mite hian an hna an zawm tur thu a sawi.

Supreme Court chuan March 29 khan Tripura High Court hnenah hriattirna pe in, sorkar zirtirtu mi 10,323 te chu December 31 thleng an hna thawh zui phalsak an nih thu a sawi. Tripura sorkar chuan Education Deparment hnuaiah non-teaching staff 12,000 lak thar tur a nih thu hi kumin May thla khan a lo puang tawh a, a hmaa lo lak tawhte chuan kumin chhung bak an hna an thawh zui loh tur thu a sawi. Dan kalah hna tam tak lak a nih chungchangah hian Supreme Court-ah petition thehluh ani a, hei vang hian hna lak hi a thara kalpui leh a ni dwn ta a ni.

Hemi chungchangah hian rorel lai Communist Party of India-Marxist chuan Bharatiya Janata Party (BJP) chu mawhphurtuah an puh a, petition pawh hi an ni hmalaknaa thehluh niin an tarlang. State sorkar chuan hemi chungchang hi chinfel a nih hma chuan hna lak a kalpui tawh rih dawn lo tih sawiin, chingfel tura hma lak thuai an tum thu an sawi bawk.

Non-teaching staff 12,000-te hian December 31 hian an hna hi an chawlhsan tawh dawn a, hnalak hi a thara kalpui a ni ang. Hnalak kalpui tur zingah hian Academic Counsellor (1,200 post), Student Counsellor (3,400), School Library Assistant (1,500), Hostel Warden (300) leh School Assistant (5,600)te a tel a ni.

Minister Chakraborty chuan 12,000 post lakthar leh turah hian Right to Education (RTE) Act leh National Council for Teacher Education (NCTE) guideline-te zawm a nih tur thu a sawi a, hnalak tur chungchangah hian state sorkar chu thuneitu a ni, a ti. Tripura sorkar chuan hnalak chungchangah hian ngaihhnathiamna pe turin a lo ngen tawh a, an state tan RTE Act chu a nihna ang diak diaka zawm theih a nih loh thu a sawi. Hei bakah hian zirtirtu 16,000 lak thar an nih theihna turin sorkar laipuiah ngenna a lo thlen tawh bawk.