NIA-te'n hel kut aṭangin cheng nuai 27 man

National Investigation Agency (NIA) chuan helpawl, National Socialist Council of Nagaland - Khaplang (NSCN-K) hruaitu Niki Sumi-a nupui

Shelly Sumi chenna-in chu Thawhlehni khan an dap a, pawisa fai cheng nuai 27 vel an man.

Niki Sumi-a hi NSCN-K-ah hian General a ni a, Nagaland-a Dimapur district-ah an cheng a ni. Hun rei tak chhung an in a chhuah san tawh a, a nupui fanaute pawh a kalsan. Tun hnai khan an pawl hian Myanmar aṭangin ṭanpuina sum ṭhahnem tak an dawng nia sawi a ni a, hemi bawhzui hian a nupui chenna-in hi an dap ta a ni. pawisa fai ṭhanem tak bakah hian mobile phone 12, laptop (3), computer hard disk leh document pawimawh 33 zet an man tel bawk.

NIA chuan thuchhuah an siamah chuan, Dimapur district-ah hian Shelly Sumi-i chenna bakah, in dang pathum vel dap a ni a, cheng nuai 27.90 leh hel pawlten an hmanṭangkai tur thil dang eng emaw zat man a nih thu an tarlang. Sum hi sorkar emaw mimal aṭanga dawng an nih an rin thu sawiin, NSCN-K camp, Myanmar aṭangin India-ah lakluh a nih thu an sawi.

National Investigation Agency hian kumin April thla khan Shelly in hi an lo dap tawh bawk a, hemi ṭum hian Myanmar aṭanga lakluh nia hriat pawisa ṭhahnem tak an lo man tawh bawk a ni.

National Socialist Council of Nagaland - Khaplang (NSCN-K) hi Nagaland-a helpawl hlun leh lian ber te zinga mi an ni.