Agartala - Delhi Rajdhani tlan ṭan dawn

Minister of State for Railway Rajen Gohain chuan Rajdhani express chu Tripura khawpui Agartala leh Anand Vihar (North Delhi) inkarah October 28 aṭang hian tlan ṭantir ani dawn tih a sawi.

Agartala-Delhi Raj­dhani express hi Delhi aṭangin Prime Minister Narendra Modi chuan video conference hmangin a vailiam dawn niin sawi mah se Prime MInister Office lam chuan an la puang chiang lo a ni. Tripura lamah Governor Tathagata Roy chu chief guest niin, a vailiam dawn thung a ni. Northeast Frontier Railway (NFR) chuan Agartala-Delhi inkara tlan nan hian darkar engzat nge hun hman ngai dawn tih an hre thuai dawn tih an sawi.

NFR offical-te chuan Rajdha­ni express hi Agartala aṭangin a tlanchhuak ang a, dar kar khata km 40-a chakin a tlan dawn tih an tarlang. Hetih rual hian zan lama tlan turin Railway Board aṭanga phalna an lak a ngai dawn a, safety board-in clearance a pek phawt a ngai dawn bawk. Railway engineering administration chuan infrastructure leh a track-te an la zirchiang leh dawn bawk a, hemi hnu hian zan lama tlan phalsak a nih tur leh tur loh a chiang chauh dawn nia tarlan a ni.

NFR offical-te chuan nimin khan Agartala hi an thleng a, a hmunah thil awm dan an enfiah dawn a ni. Tripura bakah hian a paltlang tur hmun ṭhenkhat - Assam, West Bengal, Bihar leh Uttar Pradesh-te pawh an pan leh dawn a ni. Agartala-Delhi rel service a awm theih nan hian state sorkar chuan nasa takin hma a la a, Chief Minister Manik Sarkar pawhin NFR official-te chu meeting a lo neihpui fo tawh a ni. State sorkar chuan Rajdhani express hi kar khata vawi hnih tlan tir an duh a, Railway thuneitute hnenah pawh an lo thlen tawh. Bihar leh Uttar Pradesh aṭnga Delhi pana an tlan chhunga an hun hman chu tihtlem a, Tripura lamah kar khata vawi hnih tal a tlan theih nan ruahmanna siampui turin an ngen bawk.

Tripura Transport Minister Manik Dey chuan, "Rajdhani hi pakhat chauh kan chang rih dawn a, a tlan dan tur chungchangah hian NFR leh Railway thuneitute kan la dawr leh dawn a, mipuite mamawh a phuhruk ngei theihna turin hma kan la dawn a ni" a ti. Agartala-Delhi inkara a hun hman tur zat pawh tihtlem dan ngaihtuah a nih tur thu a sawi bawk. State sorkar chuan Rajdhani express bakah hian superfast train service a awm theihna turin hma a la zel dawn tih sawiin, zirlaite leh zin veivakte awlsamna turin theihtawp chhuah zel a ni ang, a ti.

Tansport minister chuan, "Guwahati, Kolkata, Delhi, Mum­bai leh khawpui dang pan turin Tripura mipuite chu thlawh­theihnaah kan innghat a, a chuan man a to vangin mi nawlpui tan a harsa a ni. Hei hi sorkar chuan hriain a sutkianna tur kawng a dap a, a hlawhtlinna kan hmu dawn ta hi a lawmawm hle a ni" a ti.