Dan loa pem lutte dapin in tinah survey neih a ni dawn : Manipur CM

Manipur chief minister N Biren Singh chuan an state-ah ram dang mi, dan loa pem lut an awm leh awm loh dapin in tinah survey neih a ni dawn tih a sawi.

Chief Minister chuan in neitu zingah dan loa ram dang mi lutte awmpui emaw, an in luahtir emaw hmuh chhuah a nih chuan an chungah action lak a ni dawn tih a sawi bawk.

Dan loa ram dang mi awmte dapchhuahna tura sorkar hmalakna chu thlawp turin state mipute a ngen a, in neitute pawh an in luahtir leh an ram an hralh chungchangah fimkhur a, phalna nei loa awmte luahtir leh leitir lo turin a chah. Hetianga ti an hriatte chu police leh district thuneitute hnenah hriattir ṭhin turin a ngen nghal bawk.

Ram dang mi, dan loa lutte an pung zel chu ngaihven ṭhat a ngai tawh tih CM chuan a sawi. ILP Act atan chuan kum 1961 chu base year-ah hman a ni dawn tih state sorkar chuan a lo sawi tawh a, ram dang mi lut leh chhhuakte enfiahna atan hian sorkar chuan face recognition camera leh apps te siam thuai a tum bawk a ni.

Manipur police-te chuan dan loa an state-a lutte leh ILP bawhchhiate dapchhuah hna an thawk a, kar liamta thleng khan dan loa ram dang mi lut 513 a man tawh. Heng zinga a tam zawk hi Bangladesh mi niin, Myanmar aṭanga lut pawh eng maw zat an awm bawk. An mi ṭhenkhat chu thubuai siamsakin, ṭhenkhat chu thawn kir an ni.

CM chuan Manipur leilung fa dik tak hi an tam lo a, dan khauh taka kenkawh a nih loh chuan dan loa ram dang mi pemlutten reiloteah an chimral thei mai dawn a ni, a ti. Hei vang hian Population Commission chu a rang thei anga dinin, house-to-house survey hi neih thuai a ni ang, a ti.

An state-ah dan loa awm ram dang mi ṭhenkhatin driving license leh Aadhaar card-te an neih thu sawiin, Chief Minister chuan an hriat chin chu an document-te hi mansakin, thubuai pawh ziahluh a nih thu a sawi.