Assam-in industry liante MoU ziahpui

Assam sorkar chuan industry lian - Microsoft, Google, Larsen & Toubro leh Tata group-te chu field hrang hranga thawhpuina tura inremna pasarih a ziahpui.

Memorandum of Understanding (MoU) hi Guwahati-ah ziakin, Assam sorkar aiawhin Assam Skill Development Mission (ASDM) chuan inremna hi an ziak a, chief minister Himana Biswa Sarma chuan a telpui a ni.

Directorate of Employ­ment and Craftsmen Training chuan Info Edge (India), Naukri.com nen MoU an ziak bawk a, Assam Tourism Development Corporation chuan Union Ministry of Skill Development and Entrepreneurship, TATA Strive Skill Development Initiatives of Tata Community Initiative Trust leh Indian Hotels Company-te thawhpuina tur inremna a ziak bawk.

Assam Power Distribution Company Ltd (APDCL) pawhin 1,000 MW solar power siamna turin Satluj Jal Vidyut Nigam’s Green Energy Ltd chu MoU a ziahpui bawk a ni.

Chief minister Sarma chuan MoU an ziahte chuan renewable energy, skill development, tourism leh hospitality sector lama state sorkar hmalakna chu nasa takin a pui thei dawn tih sawiin, company-te chu Assam sorkar thawhpui an remtih vangin lawmthu a hrilh.

Microsoft nena an thawhdunna hian Assam Skill Development Centre hrang hrangah MDSP (Microsoft Diversity Skilling Programme) kaltlangin ṭhalaite tan kawng ṭha tak a hawnsak thei dawn a ni.

Google India hian state sorkarin ṭhalaite tana digital leh business skill lama a hmalaknaah a pui dawn a, Google Career Certificate Course kalpui a ni ang.

L&T hian construction sector-ah greenfield project siam leh thawhna lamah training a pe bawk dawn a ni.