India-China border-ah Kawngpui tam zawk sial dawn

Delhi-a Army Commander Conference neihah, India-China border-a motor kawngpui siam chungchang rel a ni a, Indian Army-te hmalaknain hna hi kalpui a ni dawn tih an tarlan.

Indian Army chuan Indian-China-Bhutan trijunction, Dok­lam-a India leh China sipaite an inep hnuah ramri hung tur hian ruahmanna siam a nih thu an sawi. China ramri depa awm state-ahte ramri hung hna hi kalpui tur a ni a, kum 2020-ah zawh hman tum a ni. Hmarchhak bakah, Central Sector lam state ṭhenkhat - Leh, Uttarakhand leh Himachal Pradesh-ahte pawh ramri hung hna hi kalpui a ni ang. Central Sector-ah hian Barahoti leh Pulam Sumda-te chu 'dispute region'-ah puan a ni a, buaina pawh a lo chuak fo tawh a ni.

June thla khan Sikkim leh China inrina bul velah India leh China sipaite chu thla hnih vel zet an inep a, an boruak pawh a chhe hman hle. Ram pahnihte hi dan loa ramri kanah an inpuh tawh a, an sipaite chu hnukkir turin an invau tawn bawk. Hetiang boruak vel a awm vang hian ramri hi ṭha zawka hung turin ruahmnan siam a ni ta a ni.

Kum hnih kalta chhung khan China ramri depah hian kawngpui km 654 zeta thui sial a ni tawh a, hei pawh hi eng emaw thutah invenna tura tih a nih thu tarlan a ni. Kum 2015 aṭang khan Sikkim-ah hian kawngpui sial thar km 49 a awm tawh a, kuminah km 6 vel siam a ni leh tawh bawk. Hetih lai hian Pakistan ramri depa awm Jammu and Kashmir-ah pawh kawngpui hi km 283-a thui siam a lo ni tawh bawk.

Ramri depa awm hmarchhak state dang - Arunachal Pradesh-ah pawh km 200-a thui peihfel a ni tawh. Heng bakah hian Himachal Pradesh (km 40) leh Uttarakhand (km 48) te pawh peihfel a a lo ni tawh bawk. A bakah km 3,417 chu kum 2020 ral hma zo hman turin ruahmanna siam a ni.

Director General Staff Duties Lt. Gen. Vijay Singh chuan hmarchhak huam chhunga ramri hnaiahte kawngpui sial hna hi chak taka kalpui a ṭul thu a sawi. Project atan hian Border Roads Organisation chuan sum an pechhuak dawn tih sawiin, defence ministry hmalakna hnuaiah kalpui a ni ang, a ti.

Conference-ah hian Chief of Army Staff Gen Bipin Rawat pawh a tel a ni.