Assam-ah ABMSU leader thattu Man phutin nawrh huaihawt

Sorkar laipui chuan Assam-a zirlai pawl pa­khat, All Bodo Minori­ty Students Union (ABMSU) leader Lafikul Islam thih dan chu Central Bureau of Investigation (CBI) chhuitir an nih tur thu a puang. Hetih lai hian Ningani khan Kokrajhar leh Baksa district-ahte pawikhawitu man chhuah vat phutin mi tam takin nawrh an lo haihawt ve mek bawk.

ABMSU bultumin nawrh hi huaihawt a ni a, pungkhawmte hian rel kawng dan an tum avangin police-te nen an innawr buai a, buaina lian tham a thleng zui lo. ABMSU member-te chuan an hruaitu Lafikul Islam thah a ni chu an dem tak zet tih an sawi a, pawikhawitu hi zawn chhuah a, a phu ang tawk hremna pek ngei an phut thu an sawi. He hunah hian Islam-a nupui leh a chhungte pawh an inlan a ni.

Police-te chuan nawrh huaihawtte hian rel kawng dan an tum avangin tear gas hmangin an hnawtdarh tih an sawi a, hun eng emaw chen chu an innawr buai tih an sawi. Lungawilote hian lung leh hmanraw dang an thawhchhuahpui avangin, van lam hawia silai hmehpuah a ni thu an sawi bawk.

Pungkhawm zinga eng emaw zat chuan hliam an tuar a, police lamah pawh mi pali-in hliam an tuar a ni. In nawrbuaina a thlen avang hian darkar hnih chhung vel chu rel service a khaihlak a, a hnuah dan pangngaiin a tlan leh a ni.

Baksa district-ah chuan ABMSU central committee member eng emaw zat chu Khandikar railway station-ah an pungkhawm ve bawk a, Kokrajhar superintendent of police hnenah chak zawka hnuchhui kalpui an phut thu an thlen a ni. Chief minister Sarbananda Sonowal hnenah memo­randum an thehlut bawk a, boruak muanawm tak hnuiah lungawi lohna hi an lantir a ni. ABMSU general secretary Shah Kamal Khandakar chuan hun eng emaw chen sor­kar hmalakna an ngaih­chan hnuah, an duh anga hmalakna kalpui a nih loh vangin nawrh hi hauihawt ta an nih thu a sawi. CBI kutah hlan ni mah se an nawrh chhunzawm zel tur thu a sawi a, pawi­khawitute chu man chhuah thuai an duh tih a sawi.

ABMSU president Islam hi Titaguri market, Kokrajhar district-ah kumin August 1 khan mi tu tih hriat lohten an kaphlum a ni. State sorkar chuan a thihdan chhui tur hian Special Investigation Team (SIT) a din a, Inspec­tor General of Police Anurag Tankha chuan a ho a ni. Islama chhungte hnenah hian sorkar chuan zangnadawmna cheng nuai nga a pe bawk. SIT din ni mah se nawrna a nasat avangin CBI kutah hian hlan a ni dawn ta a ni.