Nagaland : Ad-hoc teacher-te thil phut ngaihtuah turin committee din

Nagaland sorkar chuan an hnaa dah nghet phuta tun hnaia nawrh huaihawt, ad-hoc teacher 1,166-te thil phut zirchiang leh ngaihtuah turin High Powered Committee (HPC) a din.

Member panga awmna committee hi Principal Secretary KD Vizo-a'n a ho a, Commissioner & Secretary of School Education chu member secretary niin, committee member atan hian Finance, P&AR leh Justice & Law-a commissioner & secretary-te dah an ni.

Nagaland chief secretary J Alam chuan committee hi nakkum June 30-ah report thehlut turin a ti. Committee hian thla hnih danah review meeting an nei ṭhin dawn a, All-Nagaland Adhoc Teachers Group batch 2015 leh All-Nagaland Teachers Association aiawhte chu committee-ah an thil phut chungchang sawina hunte pek an ni ang.

ANATG 2015 Batch chuan sorkarin HPC a din chu lawmawm an tih thu leh, rah ṭha tak a chhuah ngei an beisei thu an sawi.

Ad-hoc teacher 1,166-te hian September 26 khan an hnaa dah ngheh phutin nawrh an huiahawt a, an zinga ṭhenkhat chuan tiam chin awm loin chaw an nghei bawk. Mahse sorkar aiawhte nena inbiakna neiin, ni 12 nawrh an huaihawt hnuah an nawrh hi an titawp a ni.