AP : IndiGo-in Donyi Polo airport-ah test landing hlawhtling takin nei

Arunachal Pradesh-a airport siam thar, Itanagar bula Hollongi-a Donyi Polo airport-ah commercial airlines, IndiGo chuan test landing hlawhtling takin a nei.

IndiGo hian a Airbus A320 chu Donyi Polo airport-ah hian a ṭumtir a ni.

Chief minister Pema Khandu chuan test landing hlawhtling taka neih a ni chu an state tana thil chhinchhiahtlak a nih thu a sawi a, awlsam zawka an state tlawhpawh theihna tura hmalakna hrang hranga tha thawhtute chungah lawmthu a sawi bawk.

CM Khandu chuan, "Donyi Polo airport-a IndiGo thlawhtheihna ṭha taka a ṭum thei han hmuh chu a lungawithlak hle a ni. Sorkar chuan inkalpawhna ṭha leh awlsam zawk siam hi a dah pawimawh a, Itanagar aṭang hian flight tam zawk thlawh tir an la ni ngei ang," tiin a sawi.

Donyi Polo airport hi state khawpui, Itanagar aṭanga km 15 vela hlaa awm a ni. Airport hi ram acre 685-a zauah siam niin, a siamna senso atan Rs vbc 660 ruahman a ni. Check-in counter pariat awmin, peak hour laiin khualzin 300 vel dawngsawng thei tura siam a ni. Airport hi hawn ala ni lo a, tun thla tawp lama prime minister Narendra Modi-a'n an state a tlawh hunah a hawn rin a ni.