Tripura-ah Covid-19 kai 24 awm belh

Tripura-a Border Security Force (BSF) 24-te chuan Covid-19 an kai tih Ningani khan hriat leh a ni a, heng mite nen hian Tripura-a coronavirus kai hmuh zat hi mi 88 an tling tawh a ni. 

Chief minister Biplab Kumar Deb chuan hri kai tharte Dhalai district-a Ambassa-a 86th battalion BSF headquaters ami vek an nih thu a sawi. A hmain he headquarters bula awm, 138th battalion headquarters-ah Covid-19 kai hi 62 hmuh an lo ni tawh a ni. 

CM chuan an state-a hri kai zinga pahnih chu enkawl dam an ni tawh tih sawiin, tuna hri kai zingah civil mi an awm lo tih a sawi. 

Additional chief secretary SK Rakesh chuan Dhalai district-a cheng BSF leh civil mi sample 916 chu test tura thawn a ni tih sawiin, hri kai hi an lo punbelh a nih pawhin state sorkar chu hemi atan hian a lo inbuatsaih lawk vek a ni, a ti. 

Dhalai district hi red zone-ah puan a ni tawh a, he district chhunga 138th battalion BSF headquarters bakah Gandacherra-a BSF camp leh Kareena border outpost-te chu containment zone-ah puan an ni tawh bawk. 

Assam-ah pawh hri kai hi an pun belh zel. Ningani khan Tripura leh Mizoram ramri bul, Cachar district-ah Covid-19 kai hi mi pali an awm belh a, Guwahati-ah pawh mi paliin he hri an kai tih hriat belh a ni bawk. 

Ningani thleng khan Assam-a hri kai hriat zat hi mi 53 an ni tawh a, hemi ni vek hian hri kai zinga pakhat, hmeichhe tleirawl kum 16 mi chu a thi. Assam-ah hian Covid-19 kai zinga pahnihin an thihpui tawh a ni. 

Health minister Himanta Biswa Sarma chuan Cachar-a hri kai hriatchhuah panga, (Ningania mi pali leh Nilainia mi pakhat hriat thar) te hi state sorkar pawh hriattir loa Rajasthan aṭanga rawn kir an ni tih sawiin, Silchar an thlen hnuah test neihsak an ni a, an positive tih hriat an ni ta a ni, a ti. Rajasthan-a Ajmer aṭang hian mi 43-te chu bus pakhat hmangin an rawn haw niin a sawi. 

Hri kai hmuh thar an nih leh tak avangin Guwahati-a hmun pali chu nimin aṭang khan containment zone-ah puan thar an ni. Hengte hi Gauhati Medical College & Hospital (GMCH) boys hostel pahnih, Dr B Borooah Cancer Institute leh Amiya Nagar-te an ni. PG student pakhat chuan hri hi a kai avangin GMCH hostel No. 1 leh 5 chu  containment zone-ah puan zui a ni. Containment zone-a puante hi ni 14 chhung tlawhpawh phal an ni lo a, heng hmuna awmte pawh hmundanga an chhuah khap a ni bawk. 

Assam-a sorkar hospital lian ber,  Gauhati Medical College & Hospital (GMCH) ah hian damlo admit thar an ni dawn rih lo a ni. 

Cachar district-a hmun eng emaw zat chu 'precautionary containment zone' ah puan a ni bawk. Heng hmunte hi Cachar DC phalna lo chuan tlawhpawh emaw, a hmuna awmte an kalchhuah emaw phal a ni lo.