India - Bangladesh inkarah rel service leh thuai dawn : Bangladesh Minister

Bangladesh Railway Minister Mujibal Haque chuan hunrei tak chhung India leh Bangladesh inkara rel service tihtawp chu servive tir leh tura hma lak a nih tur thu, kar kalta Inrini khan Agartala-a thuthar thehdarh tute hmaah a sawi a ni.

Railway Minister Mujibal Haque chuan India ram ṭendarh a nih hma khan rel hi service tir a lo ni tawh a, mahse hei hi kum 1947 aṭang khan tihtawp a ni ta a ni. Hei hi chhunzawm leh a nih theih nan hmalak a ni dawn a, ram pahnih hruaituten inbiakna hi an nei zel dawn a ni, a ti. Hei hian kawng hrang hrangin hmasawnna a thlen dawn a, a bik takin hmarchhak state-te tan a ṭangkai hle dawn a ni, a ti.

Bangladesh minister hian kar liam ta khan Tripura khawpui Agartala a tlawh a, a cham chhung hian sorkar mi pawimawh eng emaw zat a kawm a ni. Chief Minister Manik Sarkar nen thawhdunna tur hrang hrang an sawi dun a, insumdawn tawnna tur pawh an sawi dun a ni. Bangladesh Railway Minister Mujibal Haque hian Agartala-ah thuthar thehdarh tute a kawm a, Bangladesh sorkarin India nena thawh hona tura ruahmanna a siam hrang hrangte a tarlang bawk.