Tripura-ah journalist-in beih tawk leh

Tripura-ah kar kal ta Zirtawpni khan Communist Party of India (CPI) leh Bharatiya Janata Party (BJP)-te inkarah buaina a chhuak a, journalist pakhat chuan beih a tawk a, midang 15 velin hliam an tuar bawk.

CPM-BJP-te hi North Tripura-a Dharmanagar-ah an intibuai a, trade union member-te inkara buaina chhuak aṭanga in ṭan a ni. Buaina chhuakah hian hliam tuar eng emaw zat an awm a, an zingah hian TV journalist Anjan Bhowmik pawh a tel a ni.

Hliamte hi Agartala Govt Medical College (AGMC)-ah dah luh an ni a, mi pakuate chu Dharmanagar hospital-ah enkawl an ni bawk. Journalist-in beih a tawh leh tak avang hian boruak pawh a ṭha lo hman hle a, buaina chhuahna hmunah hian CrPC section 144 tlawhchhanin punkhawm khapna thupek tihchhuah nghal a ni.

Heti chung hian BJP-te chuan tharum thawna thleng duh lohna lantirin Dharmanagar hmun ṭhenkhatah nawrh an huaihawt zui a, police officer Rakhal Mitra chu buaina chhuah chungchangah mawhphurtuah puhin, hrem an phut thu an sawi. Hetih lai hian BJP MLA Biswabandhu Sen pawhin hliam tuar zinga mi 12-te chu police-te'n kut an thlak vang a nih thu a sawi.