Naga Issue : Manipur team-te'n Modi dawr dawn

Manipur team chuan sorkar laipuiin Naga hel, National Socialist Council of Nagaland, Isak-

Muivah (NSCN-IM)-te inbiakna a neihpui hma ngeiin Prime Minister Narendra Modi hmuh an tum thu an sawi.

Hemi chungchangah hian Chief Minister N Biren Singh chuan kar kal ta Inrinni khan all-party meeting a ko a, he hunah hian Modi dawr tura pali intirh hi an rel a ni. Chief Minister chuan Delhi lamah Naga chungchanga hma la tur hian team tirh remtih a ni a, party hrang hrang aiawhte chuan PM hnenah memorandum an thehlut dawn a ni, a ti. Sorkar laipui leh Naga helte indawrna hian an state ralmuanna a tihchiat an remti dawn lo tih sawiin, Naga-te chenna chin pawh tihdanglam an remti lo tih a sawi.

All-party meeting-ah hian BJP, Congress, Trinamool Congress, Shiv Sena, Communist Party of India, JD(U), NCP, Manipur Nationalist Democratic Party leh party tenau dangte pawh an tel a, party hrang hrangten aiawh an tir ṭha hle a ni. Hetih lai hian BJP thawhpui Naga People’s Front (NPF) chu an inlan lo a, an tel loh chhan hi an tarlang lo bawk. Hetih rual hian NPF chuan Naga-inhabited area chu tihdanglam loh a, rorelna pakhat hnuaia awm an duh thu thuchhuah siamin an tarlang a ni. ‘Nagalim’ (Greater Nagaland) din chu an tum ber a nih thu an sawi a, Assam, Manipur, Arunachal Pradesh leh Myanmar-a Nagate chu rorelna pakhat hnuaiah awm an duh tih an sawi.

Hetiang boruak a awm mek lai hian Nagaland Governor P.B. Acharya chuan Nationalist Socialist Council of Nagaland-Khaplang (NSCN-K)-te chu sorkarin remna zawnga inbiakna nei tura hma a lak mek ngaichang tur leh, harsatna siam lo turin a ngen. P.B. Acharya chuan pawl hrang hrang pawhin inremna a awm theih nana hmalakna chu an thlawp thu sawiin, NSCN-K-te chu mipuite harsatna thlen lo zawnga awm turin a duh tih a sawi.

Nagaland chief minister TR Zeliang pawhin Naga chungchang chu chinfel thuai a duh thu sawiin, boruak muanawm tak hnuaiah inremna siam ni thei se a duh a ni. Buaina chinfel chu thil pawimawh tak a nih thu sawiin, hemi tihlawhtling thei tur hian thawhho ṭha neih a ṭanrual a pawimawh a ni, a ti bawk.

Sorkar lapui chuan kum 2001 khan Naga hel NSCN-K-te hi ceasefire accord a lo ziahpui tawh a, March 2015 khan framework agreement a lo ziahpui tawh bawk. Mahse tun thlengin inremna tluantling a la awm thei lo a, inbiakna nei turin hmalakna kalpui leh mek a ni. Naga helpawl lian hian Nagaland, Arunachal Pradesh leh Manipur-ahte India sipai an thah fo avangin remna zawnga hmalaknaah pawh harsatnaa thlen phah a ni.

Remna zawnga inbiakna neiha palai hna thawktu R.N. Ravi chuan tun hnai khan NSCN-IM, Naga National Council, Federal Government of Nagaland, NSCN (Reformation), National People’s Government of Nagaland (Non-accord) leh Government Democratic

Republic of Nagaland (Non-Accord) hruaitute chu a lo dawr tawh a ni. Hetih rual hian inbiakna tak tak nei tur chuan hmabak a la hautak hle nia sawi a ni a, sorkar laipui nenna inbiakna an neih hun tur pawh hriat ala ni lo.