Assam-a district 8 leh sub- division 1-ah AFSPA pawtsei

Assam sorkar chuan sipai hnena thuneihna sang pekna, Armed Forces (Special Powers) Act, 1958 (AFSPA) chu an state-a district pariat leh sub-division pakhatah thla ruk dang atan a pawtsei.

AFSPA pawhseina thupek hi Ningani khan state sorkar chuan a tichhuak a, hetih lai hian West Karbi Anglong district boruak chuan ṭhat lam a pan zel nia sawiin he district bikah AFSPA hi hlih a ni thung.

Home and political department principal secretary, Niraj Verma chuan dan leh thupek dinhmunte an thlir hnuah district ṭhenkhatah AFSPA hi pawhsei a nih thu sawiin, hei hi October 1 aṭanga chhiar ṭan tur a ni tih a sawi.

AFPSA la hman chhunzawmna turte chu - Tinsukia, Dibrugarh, Charaideo, Sivasagar, Jorhat, Golaghat, Karbi Anglong leh Dima Hasao district-te bakah, Barak Valley-a Cachar-a Lakhipur sub-division-ahte a ni.

Sawisel hlawh tak, dan sakei tia sawi ṭhin, AFSPA hi kum 1990, November thla aṭang khan Assam-ah hian hman ṭan a ni a, state chhung boruak thlirin thla ruk danah pawhsei chhoh zel a ni.

AFSPA hnuaiah hian sipaite hi thuneihna sang tak pek an ni a, warrant nei kher loin mi in dap leh mi man theihna an nei a, rinhlelh zawngte kah theihna an nei bawk. Hei bakah hian an beihpui thlaknaah dik tawk loa thilti nia puh chungchangah pawh security force-te hum theihna dan eng emaw chen a awm bawk. Hei vang hian he dan hmanna state hrang hranga civil society group leh rights activist-te chuan titawp turin an phut reng a, AFSPA hmang hian armed force-te chuan mihring dikna chanvo an palzut ṭhin tih an sawi.

Nikum December thlaa security force-ten Mon district, Nagaland-a civil mi 14 an kahhlum hnuah phei chuan hmarchhak bial pum aṭanga AFSPS hlip tura sorkar laipui nawrna hi a na hle a ni.