Tripura : Zirtirtu banten tiam chin awm loin chaw nghei

Tripura-a zirtirtu aṭanga ban tak, mi 10,323 zinga ṭhenkhat chuan Ningani aṭang khan an hnaa dah let leh phutin tiam chin awm loin chaw an nghei ṭan.

Pardeip Banik kaihhruaiin zirtirtu ban tak ṭhenkhat chuan Agartala-a Orient Chowmuhani-ah chaw ngheia nawrh hi an huaihawt a ni.

Zirtirtu ban takte hian Joint Action Committee an din a, mahse he committee lak aṭang hian Pradik Banik kaihhruaite hi an in la hrang a ni. Pawl dangte chuan Banik-a pawlte hi hmalakna hi an thlawp lo thung. JAC hnuaia pawl dang hruaitu, Kamal Deb chuan an hnaa dah ngheh an phut chungchangah chief minister Manik Saha chuan Diwali festival zawh hun nghak tura a hrilh thu sawiin, an ngaichang phawt dawn tih a sawi. "October 25 hnu lamah sorkar lam aṭangin thu lawmawm hriat a awm loh chuan nawrh hi kan zawm ve ang," a ti.

Banik chuan Education leh Law department-a official ṭhenkhatten an dinhmun chu an ngaihthahsak avanga an hna chu chan niin a sawi. An state-ah sorkarna changtu political party-te a inthlak chho a, sorkar thar siamtu party chuan an harsatna chinfel sak tiam mah se tun thlengin engmah danglamna a la awm lo tih a sawi. An hnaa dah let leh an duh a, nawr dan kawng dawng an hriat tawh loh avangin chaw ngheia nawrh hi an huaihawt ta tih a sawi bawk.