Arunachal-ah India - China border meet nei

Tawang, Arunachal Pradesh-ah Thawhṭanni khan India - China border chungchangah ram pahnih aiawhten meeting an nei.

Tawang-a Bumla-ah meeting hi neih a ni a, India aiawhte hi Brig M.P. Singh chuan a ho a, China palaite chu Senior Colnel Liu Jiang Xun-a'n a ho ve bawk. Ram pahnih palaite hian meeting ṭan hma hian flag an pawt pharh a, hnam hla an sa bawk. He hunah hian rami chungchang an sawiho a, buaina chinfel dan tur hrang hrang an sawiho a ni.

Ram pahnihte hian ramri chung-changah buaina an nei fo a, kumin June thla pawh khan Sikkim sector-a Doklam-ah an lo inep tawh a ni. Ram pahnih sipaite hi thla hnih dawn an inep a, an boruak pawh a che hman hle. Ram pahnihte hi ramri kana cheah an inpuh tawn a, an sipaite hnukkir turin an invau tawn bawk. Tlawm zawk nih an duh loh ve ve avangin hun rei tak chhung an buai a, hruaitu lawkte an inrawlh hnuah an inṭhaṭhen thei chauh a ni.

India chuan China hian Doklam-ah hian dan kalhin kawngpui a siam niin a sawi a, mahse hei hi China chuan a pha thung. Kawngpui a siamna hmun hi hmasang atan tawha a ram luah ṭhin a nih thu sawiin, thuneitu a nih thu a sawi. Mahse hei hi India leh Bhutan chuan an pawm lo a, Bhutan ram a ni, an ti. Hemi a nih vang hian India chuan Bhutan ngenna angin China sipaite dang tur hian a sipai ṭhahnem tak a tir lut a, China sipaite hnathawk an dang a ni.

China chuan India chetdan duh lohna lantir hian Sikkim-a Indian Bunker a tichhia nia tarlan a ni a, India ram chhungah a sipaite a luh tir a ni. Mahse hei pawh hi India chuan a pha a, Chinese troop-te'n Line of Actual Control (LAC) an paltlang lo niin a tarlang. Ramri chungchangah hian thu rintlak leh belhchian dawl tak a awm lo niin mi ṭhenkhat chuan an ngai a, an thu leh hlaah hian khawi zawk nge pawm tur hriat a harsat thu an sawi. Hetih rual hian ramri chungchangah hian an buai ngei tih chu a hriat a, tunah pawh buaina chingfel turin inbiakna hi an nei leh ta a ni.

Hetih lai hian China President Xi Jinping chuan Arunachal Pradesh ramri dep, Lhunze County-a Tibet chhungkaw chengte chu sawn chhuah an nih loh tur thu a sawi. Xinhua news agency chuan president chuan he lai hmuna chengte hi sawnchhuah tumna a nei lo tih sawiin, a thutlukna hi Communist Party of China (CPC) Central Committee pawhin a pawmpui tih a tarlang. A thutlukna hi kar kalta Inrinni khan puan a ni a, heng lai hmuna chengte himna tur hian China sorkar chuan hma a lak zel tur thu tarlan a ni bawk.