World Bank-in Assam sorkar hnenah $mtd 200 pe dawn

World Bank chuan Assam sorkar hnenah agricultural sector atan hman turin $mtd 200 a pe dawn a, loan hi International Bank for Reconstruction and Development (IBRD) hnuaiah pek chhuaha ni ang.

Assam sorkar leh World Bank-te hian inremna an lo ziak tawh a, IBRD hnuaiah loan hi pek chhuah a ni dawn a, kum 16 chhung Assam sorkar chuan arul dawn a ni. Heng sum hmang hian agricultural sector lamah hmalak a ni dawn a, chungkaw nuai nga chuangin an chhawr theih beisei a ni. Project hi district 16-ah kalpui tura ruahman a ni a, 30% chu hmeichhe puala dah a ni ang. Agriculture-a innghat chhungkaw chawikanna tur project a nih angin, a tam thei ang berin an chhawr theih beisei a ni a, a bikin hmeichhe enkawl chhungkuate duhsak an ni ang.

World Bank Operation Manager, Hisham Abdo chuan India sorkar remtihpuinaa Assam sorkar nena inremna an siam thei chu lawmawm a tih thu a sawi a, he project hian chungkaw tam tak tan malsawmna a thlen ngei a rin thu a sawi. Assam sorkarin kuthnathawka eizawngte chawikang tura a hmalakna te chu fakawm a tih thu sawiin, an thlai thar a leta tipung tura an beihna hi a hlawhtling ngei a rin thu a sawi bawk.

Assam hian kuminah tuilian a tuar nasa hle a, an buh leh bal thar chhuah pawh a tlak hniam phah rin a ni. Tlai chhina hmun 50% zet a chimchhia a, hei vang hian lo neitute chuan harsatna nasa tak an tawk a ni. World Bank-a Senior Agricultural Specialist Manivannan Pathy chuan he project hian Assam mipuite chunga tawrhna nasa tak thleng chu a sutkian ngei a beisei tih a sawi.