North East Youth Festival zawhfel a ni ta

Sikkim-in North East Youth Festival ṭum ngana a thlen chu Pathianni khan ṭan niin, nimin khan zawhfel a ni.

Ni thum awh North East Youth Festival 2017-ah hian hmarchhak state pariat aṭangin tel an ṭhahnem hle a, a hawnni hian state hrang hrang awiawhte chuan an hnam lamte an entir a ni. Festival hi Paljor Stadium, Gangtok-ah neih a ni a, Sikkim High Court Chief Justice, Justice Satish Kumar Agnihotri chuan a hawng a ni. Justice Satish Kumar chuan festival chhimtute zawng zawng chu duhsakna a hlan a, hmarchhaka hnam hrang hrangte inkarah in unauna ṭha a awm zui zel a beisei thu a sawi.

Festival hawngtu Justice Satish Kumar chuan, hmarchhak chu leilung hausaknain a vur, ram nuam tak a ni, a ti a, hnam hrang hrangte culture chu zir tham a nih thu a sawi. Heng leilung hausaknate hi lakchhuah thiam a, chawr ṭangkai a nih chuan hmasawnna thlentu pawimawh tak a ni thei a, chu tih rual chuan ram leilung tichhe lo zawnga hmalak a pawimawh thu a sawi. South East Asia ram hrang hrangte nena inzawmna ṭha zawk nei tura hmalak a pawimawh thu sawiin, chu chu state tinte hmasawnna tur kawng pawimawh a ni, a ti bawk.

Kumina festival hi Sikkim sorkar leh Union Ministry of Youth Affairs & Sports ṭangkawpten an buatsaih a ni a, thupuiah hian “Youth for Organic Farming” tih hman a ni. He hunah hian Sikkim Governor Shriniwas Patil pawhin thu a sawi a, Sikkim sorkarin 'Organic State' hmasa ber ni tura a hmalakna hrang hrangte chu fakawm a tih thu a sawi. Hmarchhak state dangte pawhin theihtawp chhuah se a duh thu a sawi bawk.

Ministry of Sports and Youth Affairs-a Additional Secretary Kiran Soni Gupta pawhin festival hi a chhim a, hmarchhak state hrang hrang aṭanga ṭhalaite chu ram pum huapa mi chhuanawm tak tak te an nih thu sawiin, inlungrual taka hma lam pana kal zel turin duhsakna a hlan. India ram 'Organic State' hmasa ber Sikkim chu kawng hrang hranga entawn thlak a nih thu a sawi bawk.

Festival-ah hian mi 1,500 vel an fuan khawm a, intihsiakna hrang hrang buatsaih a ni. Folk dance-ah Assam chu pakhatna an ni a, Meghalaya leh Manipur-ten an dawt. Folk song-ah Tripura pakhatna an ni a, Assam leh Manipur-te'n dawtin, act play competition-ah Manipur an ti ṭha ber thung a, Tripura leh Sikkim-te'n pahnihna leh pathumna an hauh. Painting competition-ah a thlengtu Sikkim an che ṭha ber a, Clay modeling competition-ah Manipur pakhatna niin, photography competition-ah Assam an che ṭha leh a, Tripura leh Mizoram-te a ti ṭha pathum zingah an lang ve bawk.

Tun hi Sikkim-in North East Youth Festival a then ṭum khatna a ni.