KSU-in Meghalaya tan Article 371 hman phût

Khasi Students' Union (KSU) chuan sorkar laipui chu kum 1948, August 17-a 'Khasi state' 25 te 'Instrument of Accession' a lo ziahpui tawh chu a taka kalpui tur leh, Meghalaya state tan Article 371 hmang turin an phût.

KSU president Lambokstar Marngar chuan, kum 75 chhung zet tihkhawtlai tawh, Standtill Agreement and Annexed Agreement chu a taka kalpui tawh tura sorkar laipui an ngen tur thu a sawi.

Marngar chuan, "Sixth schedule bakah, Nagaland leh Mizorama hman a nih angin, Article 371 (A) leh (B) chu Hynniewtrep ram thuam chakna turin hman a ni ve tur a ni," a ti.

KSU hotu chuan Constitution of India Eight Schedule-ah Khasi ṭawng chu telh thuai tura sorkar laipui an phût thu a sawi bawk. Hei bakah hian kum 35 chhung zet an lo phut tawh, Inner Line Permit (ILP) system chu an state-a hmantir thuai turin an phut tih a sawi bawk.

Kar liamta Zirtawpnia meeting an neihah anmahni puala national anthem neih a ṭul thu pawh sorkar laipui sawipui an tum tih Marngar chuan a sawi. "India national anthem hi kan hrethiam lo a, Rabindranath Tagore-a hla siamah hian telh kan ni lo bawk. Kum 1911-a he national anthem siam a nih lai hian India khua leh tui kan ni lo tih chiang takin kan hrethiam a ni," a ti.