Tripura : BJP-in TIPRA thawhpui dawn lo

Tripura-a Bharatiya Janata Party (BJP) vice president Dr Ashok Sinha chuan nakkuma state assembly inthlan neih turah, Tripura Tribal Autonomous Areas District Council (TTAADC)-a rorellai TIPRA Motha chu thawhpui an tum lo tih a sawi.

Inrinni liam taa Agartala-a press conference a neihah, Dr Sinha chuan, "Central lama kan party hotute chuan party dang thawhpui neih belh an tum lo tih an sawi. Mahse IPFT nena kan thawhdunna erawh kan titawp lo ang. BJP hian thawhdunna a tichhe ngai lo. Mahse thawhpui tur thar erawh kan zawng lo," a ti.

Sate chhung hmun hrang hranga TIPRA leh BJP worker-te inkara buaina chhuak fo chungchang pawh sawiin, Dr Sinha chuan a bul ber chu TIPRA-ten an party dinhmun chhiat zel an hlauh vanga chhuak ṭhin niin a puh.

"TTAADC election-ah IPFT chuan seat an hloh vek a, BJP chuan a chuhna zingah seat hnih a hloh thung. TIPRA hian an chak chhan chu an vote share pung chak vang ni loin, IPFT chetchhiat vang tih an hria a, hei vang hian BJP rawn len chhoh zel an hlau a, min dan tumin an che a ni," a ti.