AP : Paper leak chhui dan mipui hriata puangzar turin phût

People's Party of Arunachal (PPA) chuan Arunachal Pradesh Public Service Commission (APPSC) examination question paper leak chhui mek chu mipuite hriatah puangzar zel tur leh, action an lak tawh dante pawh puang chhuak zel turin state sorkar an phût.

PPA chuan hemi chungchanga thuchhuah an siamah, state sorkarin paper leak chungchang CBI chhui tir turin rawt mah se, hei chauh ni loin APPSC kalphungte pawh enṭhat a, chhui chian tel a ṭul thu a tarlang.

Party secretary Kaling Jerang chuan, kum 2014-a APPSC combined competitive examination paper leak kha SIT in a chhui a, mahse he case an chhui dan kimchang leh action lak a nih dante chu mipuite hriatah puanzar a ni lo niin a sawi. "Khatihlai khan mipui lam pawh an lungawi lo hle. State sorkar khan hma a la ṭha tawk lo a, hei hian exam hmachhawn tumte rilru thlengin a tihnual a, hei bakah mipuiten institution an rinna thlengin a nghawng a ni," a ti. APPSC hian mipuite beiseina a pha lo fo a, hei vang a kalphung pawh siamṭhat ngai a ni, tiin a sawi.

Paper leak kaihhnawihah hian Itanagar police station-ah thubuai ziahluh niin, mi 10 man an ni tawh. An zingah hian APPSC deputy secretary leh deputy controller of examination Taket Jerang pawh a tel. APPSC secretary Jayanta Kumar Ray leh joint secretary Suraj Gurung-te suspend an ni a, October 14 khan commission chairman Nip Nabam pawhin banna a thehlut tawh bawk a ni.