Sikkim : ILP hman chungchangah rorellai party in inbiakna neih duh

Sikkim-a eptu party, Hamro Sikkim Party (HSP) leh social organisation hrang hrangin Inner Line Permit (ILP) system hman an phut mek karah, rorellai party Sikkim Krantikari Morcha (SKM) party chuan inbiakna neih a inpeih thu a sawi.

SKM media cell chief coordinator, Bikash Basnett chuan ILP hi mipui nawlpuiin an nawr lo a, political party thenkhat chauhin an nawr tih a sawi "Hmarchhak state zinga ILP hmang mekte chu tribal state an ni a, mahse Sikkim hi tribal state a ni ve lo. Thuneitute chuan hnam 12 telh ve lohten an tribal status an beihsak mek a ni. Hei hi tihfel a nih hunah, Sikkim-ah ILP system hi hman a ni ang. Hemi chungchang hi political party dangte pawh sawipui turin sorkar chu a inhawng reng a ni, "a ti. Dan loa an state-a hnathawk tura lutte venna turin labour law hman a ni tawh tih a sawi bawk.

Tun hnaiah HSP chuan 'Jan Sansad' buatsaihin, he hunah hian organisation 20 chuang aiawhte an tel. Sikkim sorkar chu ILP system hman an phutna resolution pass a, sorkar laipui hnenah hlan turin an phut a ni.