Meghalaya : ILP chungchangah mi hrang hrang ngaihdan lak a ngai : Rijiju

Union law minister Kiren Rijiju chuan Meghalaya-a Inner Line Permit (ILP) system hman phut chungchangah sorkar laipui chuan mi hrang hrang ngaihdan a lak a ngai a ni, a ti.

Rijiju chuan Meghalaya state mipui tam zawk ngaihdan lak a, biakrawn phawt an ngai a ni tiin, "Dan hian mipuite harsatna siam loin, an ṭhat tlanna tur zawk a thlen tur a ni," tiin a sawi.

September thla khan chief minister Conrad K Sangma chuan an state-a ILP hman an phut chungchangah sorkar laipui chhanna an nghak mek tih a sawi a ni. CM chuan state assembly-a ILP hman phutna resolution an pass chu February thla khan union home minister Amit Shah hnenah an thehlut tawh thu a sawi bawk.

Kum 2020-a Parliament-a Citizenship Amendment Act (CCA) pass a nih hnuah, Meghalaya-ah hian ILP hman phutna a nasa chho hle a, zirlai pawl bakah civil society organisation hrang hrang pawhin state sorkar an nawr mek a ni.

ILP an phut chungchanga sorkar laipui lamin thawm a neih mai loh avangin Khasi Students' Union (KSU) chuan Meghalaya-Assam border-ah 'ILP checkgate' te an siam a, mahse hei hi Meghalaya police-ten an ṭhiahsak tawh. KSU president Lambokstar Marngar chuan dan loa an state-a lutte venna turin check gate siam hi a ngai tih sawiin, ILP chungchang chu sorkar laipui pawhin a ngaihtuah thuai an phut thu a sawi.