PM Modi leh Dalai Lama-ten AP an tlawh dawn

Prime minister Narendra Modi leh Tibetan sakhaw hruaitu Dalai Lama-te chuan a hran ve vein Arunachal Pradesh an tlawh dawn.

PM Modi hian tun kar chhungin AP hi tlawhin, an state-a airport hmasa ber chu a hawng dawn a ni. West Kameng district-a 600 MW Kameng Hydroelectric project a hawng nghal bawk ang.

Dalai Lama pawhin AP hi tlawh thuai a tum a, mahse a kal hun tur tak erawh puanzar a la ni lo.

Arunachal Pradesh hi China chuan a ram chinah a la chhal reng a, hei vang hian hruaitu pahnihten an tlawh tur pawh hi China chuan a ngaimawh hle rin a ni. Tun hma lam pawhin India Prime Minister, President leh Dalai Lama-ten Arunachal Pradesh an tlawh apiangin a lawm loh leh lungawi loh thu a sawilang ziah ṭhin.

Kum 87 mi, Dalai Lama hian Tawang a thlen rin a ni a, 17th century monastery Gaden Namgyal Lhatse-ah ni rei vak lo a cham ang. Kum 2017 khan Tawang hi a lo tlawh tawh a, hemi ṭum pawh hian China chuan na taka sawiselin, India sorkar chu AP-a Dalai Lama zin a phalsak avangin India-China inlaichinna tihchhiatphahah a puh hial.

Hetih lai hian India sorkar chuan Arunachal Pradesh chu a ram chhung dik tak a ni tih a sawi thung a, Dalai Lama pawh India ram khualṭha a nih avangin ram chhung khawi hmunah pawh a tlawh thei a ni, a ti thung.

Dalai Lama hian China-in Tibet ram a luahsak hnuah China sipaite lak aṭangin kum 1959, March thla khan India ramah rawn tlanchhiain a khawsa zui ta a ni. Tharum tello leh zalenna hlutzia tlangau puiin, kum 1989 khan Nobel Peace Prize hlan a ni. Tibet ram hi China lak aṭang inlahrang kher loa thuneihna sang zawk pek a phut a ni. Mahse China chuan inlakhran tum leh China ṭhendarh tuma hma laah a puh thung.