Assam sorkarin a hnathawkte DA tipung

Assam sorkar chuan state sorkar hnuaia hnathawkte Dearness Allowance (DA) chu 4% in a tipung. Hei hi kumin July thla aṭanga hman ṭan a ni ang.

Chief minister Himanta Biswa Sarma chuan Pathianni zing khan DA tihpun a nih thu hi a puang a, hei hian Diwali hmangtute hlimna a thlen belh ngei a rin thu a sawi.

Kumin March thla khan Assam sorkar chuan DA hi 3%-a tipungin 11% a pe tawh a, hei hi sorkar hnathawk leh pensioner-ten an hmang mek a ni. Hei bakah hian October 19 khan home guard-te daily duty allowance chu Rs 300 aṭangin Rs 767-ah tipungin, hman nghal tura tih a ni. Allowance a tihpun sak hnuah home guard-te thla hlawh hi Rs 23,010-ah a pung a ni.