Manipur : Congress-in BJP zawmtu JD-U MLA-te disqualify a phut

Manipur-a Janata Dal-United (JD-U) MLA panga, September thlaa BJP zawmtute chu MLA an nihna aṭanga ban turin Congress party chuan a phut.

Manipur state Congress vice president Hareshwar Goshwami chuan Manipur Assembly speaker Thokchom Satyabrata Singh hnenah JD-U MLA uire pangate disqualify tura ngenna hi a thehlut a ni.

Assembly speaker K Meghajit Singh chuan a hmain Speaker hian Constitution 10th Schedule hnuaiah JD-U MLA pangate hi BJP legislature party-a an inchhunluh a pawmsak tih a sawi a ni.

Chife minister Biren Singh leh BJP president JP Nadda-te chuan an party zawmtu, JD-U MLA pangate hi Imphal leh New Delhi-ah a hranin an lo lawmlut ve ve tawh bawk.

Kumina assembly inthlanah khan JD-U candidate 38 siamin, seat parukah an chak a ni. Biren Singh kaihhruai BJP sorkar chu JD-U MLA-te hian an thlawp zui bawk. A hnuah an zinga pangate hian an party hi chhuahsanin BJP hi an zawm a, heng mite hnenah hian assembly seat 60 awmnaah BJP hian MLA 37 a nei mek a ni.

CPI-in Assembly special session neih an duh
Communist Party of India (CPI), Manipur State Council an state-a loneitute harsatna tawh mekte leh, an harsatna sutkian dan ngaihtuahsak turin Manipuir Legilative Assembly special session neih an phut thu an sawi.

CPI state secretary L Sotinkumar chuan kumin furah ruahtui a tlak ṭhat loh avangin state chhunga loneituten an tuar hle tih sawiin, hei bakah lei tihṭhatna a awm ṭhat tawk loh avangin an thlai tharchhuah pawh a tlahniam hle tih a sawi. Tui leh fertilizer awm ṭhat tawk loh avangin leileta an buh chin tam zawk a chhia a ni, a ti. Hmun dangah pawh kum hmasa lam aiin thlai an thar tlem hle tih a sawi bawk.

Loneitute harsatna nasa tak an tawk chungin state sorkar, a bikin Agriculture department chuan an harsatna sutkian sakna turin engmah hma an la lo a ni, a ti.