AP : RPF helpawlin Army helicopter an kahthlak thu an sawi

Arunachal Pradesh-a October 21-a Indian Army helicopter tla chu helpawl, Revolutionary People's Front (RPF) chuan an kahthlak a nih tih an sawi.

RPF chuan thuchhuah siamin, an pawl military wing Manipur Naga People’s Front leh People’s Liberation Army (PLA) chuan RPG leh mortar hmangin Arunchal Pradesh-ah Indian Army helicopter an kahchhiat thu an tarlang. "Rudra Advanced Light Helicopter kalan tur lam hi a hma ni hnih liamtaah khan kan cadre-te chuan an lo hre tawh a, he helicopter-in kan cadre-te target a rawn thlen veleh MNPF leh PLA-te chuan zing dar 10 khan ambush-in RPG leh mortar hmangin an lo kap a ni," an ti.

Helpawlin thuchhuah an siamah hian sorkar laipui chu Manipur, Nagaland, Assam, Arunchal Pradesh, Punjab leh Jammu and Kashmir-a Indian armed force a dahte lakir vek turin an ti bawk. An thil phut hi tihhlawhtlin a nih loh chuan Indian armed force-te chu an beih chhunzawm zel tur thu an sawi.

RPF hian ahmain Manipur-a Assam Rifles convoy an lo ambush tawh a, sipai panga thihna thleng pawh an pawl tih a nih thu an lo sawi tawh bawk.

Helpawl thusawi hi a dik leh dik lo finfiah a ni lo, mahse social media lamah erawh an thehdarh nasa hle.

October 21-a AP-a Upper Siang district-a Indian army helicopter, Rudra advanced light helicopter (ALH) tlaah khan mi panga chuangin, an vaiin an thi a ni. A tlakna hmun hi India-China border bul, Singging a ni. Air Traffic Control (ATC) chuan helicopter tlak hma hian a khawl lam fel loh chungchangah 'May Day' call an dawng tih an sawi.