Sikkim airport hmasa ber tur peih hnai

Sikkim sorkar thuchhuahin a tarlan danin, Sikkim-a airport hmasa ber tur chu November 30-ah hawn turin peihfel a ni dawn.

Sorkar thupuangtu chuan Airport Authority of India lamin phalna a pe a nih phawt chuan an tum ni hian Airport hi hawn a nih dawn thu a tarlang. Airport hwng tur hian Prime Minister Narendra Modi beisei a ni a, dilna hi Prime Minsiter Office (PMO)-ah pawh thlen a ni tawh. PMO chuan a la chhanglet lo thung.

Sikkim Chief Minister Pawan Kumar Chamling chuan November 7 hian Delhi-ah 19th Organic World Congress hmang turin a kal dawn a, hemi pah hian Prime Minister Narendra Modi pawh hmaichhan ngeiah sawm a tum thu a sawi.

Sikkim-a airport hmasa ber tur hi Pakyong khuaah siam a ni a, Gangtok aṭanga km. 35-a hla a ni. Airport zauh zawng hi acre 990 a ni. Airport siam nan hian cheng maktaduai 300 sen a ni a, hmarchhaka greenfield airstrip hmasa ber a ni dawn bawk. Sikkim Airport hi ramchhunga airport sang ber panga-na a ni dawn a, ft. 4,700 zeta sang a ni.

Cabinet Committe on Eco­nomic Affairs chuan 2008 khan he airport sak tur hi a lo pawm tawh a, kum 2012-a siam zawh tura ruahman ni mah se, a hunah zawh hman a ni lo. Mahse compensation vangin tualchhung mite leh airport siam buaipuitute inkarah harsatna a awm hnuah kumin hian an peihfel ve thei chauh a ni.

Sikkim-a airport awm tur hian khualzin mite nasa lehzuala a hip beisei a nih bakah, Himalayan-a chengte tan hahdamna a thlen ngei beisei a ni bawk.