Assam : APSC scam-ah officer 16 man

Assam-a Dibrugarh Police-te chuan Nilaini khan Assam Civil Service leh Asam Police Service official 15 hmun hrang hrang ami chu an man. Anni bakah hian mi pakhat chu zanlaiah police kutah a inpe bawk.

Heng an mi mante hi Assam Public Service Commission (APSC) scam vanga man an ni a, thamna lak vanga man an nih thu tarlan a nih bakah, midang pakua zawn mek an la nih thu report chuan a tarlang. An mi mante hi an awmna district hrang hrangah man an ni a, an hna neih nana thamna pawisa an pek avang leh thamna an lak vangtea man an ni hlawm. An zingah hian APSC chairman hlui Rakesh Paul pawh a tel thu tarlan a ni.

Man zingah hian ACS officer pasarih, APS officer panga leh service officer dang pathum an tel a, thudawnnain a tarlan dan chuan heng an mi mante hi 2013 batch an ni a, hna an neih nan hian cheng nuai 15 aṭang a, nuai 30 vel thamna an pek thu tarlan a ni bawk.

Heng an mi mante hi chhui chian an nih hnuah forensic department chuan an chhana lehkha an enchiang a, an handwriting an enfiah hnuah candidate 25 chu sorkar hna hi dik lo taka hmu an nih thu chhuichhuah a ni ta a ni.

Investing officer Surjeet Sing Panesar chuan an channa lehkha hi forensic laboratory paruk zetah enfiah a nih hnuah, an kutziak nena inmil lo a nih thu hmuhchhuah a ni tih a sawi a, an rinhleh mi 25-te chhanna lehkha an enfiah thu a sawi bawk.

Special public prosecutor Bijon Kumar Mahajan chuan hei hi state sorkarin 'zero tolerance against corruption' a kalpui meka hmalakna avanga hriatchhuah a nih thu sawiin, sorkar chuan thil engkim langtlang thei ang bera siam a tum thu a sawi bawk. Thudawnnain a tarlan dan chuan an mi rinhleh dangte pawh hi rei loteah mipuite hriat theiha pho lan an nih tur thu a sawi.

Officer-te hi Special Branch Headquarter-ah zawhna zawh an nih hnuah, Court of Special Judge, Assam thuneihnain poilce kutah ni 14 an awm dawn a ni. An zinga pakhat chu Hailakandi aṭanga Guwahati pan pui mek a nih thu tarlan a ni bawk.

APSC hniah hian thamna sum leng avangin mi eng emaw zat man an ni tawh a, he thilah hian Rakesh Paul chu mawhphurtu berah puh a ni a, chairman a nihna aṭanga ban a lo ni tawh bawk.