Defence Minister-i'n AP a tlawh China-in dem
Defence Minister Nirmala Sitharaman-i chuan Arunachal Pradesh-a India sipai hmun a tlawh a, hemi chungchangah hian China chuan thuchhuah siamin, India chet dan chu a dem thu a tarlang.
China chuan ramri chung changa India nena buaina an neihna hmun Defence Minister-in a tlawh hian remna leh muanna lam a hawi lo an ni, a ti.
Sitharaman-i'n Pathianni kaltaa Arunachal-a India sipai hmun a tlawh chu sawiselin, China dinhmun tur chu a chiang hle niin, China Foreign Ministry thupuangtu Hua Chunying chuan a sawi. Chunying chuan helai hmun hi ram buai a ni a, ramri lehlam India Defence Minister-in a tlawh hi remna leh muanna zawnna kawng a ni lo, a ti. India chuan China nena an inkar buaina chinfelna tur a zawn zawk a ṭul thu a sawi bawk.
China hian Arunachal Pradesh hi South Tibet peng pakhat-ah a nih thu a sawi fo a, hemi a nih avang hian India sorkar hotu lute'n an tlawh pawh a helh ṭhin hle a ni. India leh China inrina Line of Actual Control (LAC) hi km 3,488-a thui a ni a, heng lai vela buaina chinfel tur hian ram pahnih te hian inbiakna vawi 19 lai an lo nei tawh a ni. Mahse tun thlengin inremna mumal a la awm thei lo.