Hornbill-ah plastic lam hman khap dawn

Nagaland sorkarin festival a buatsaih ṭhin 'Hornbill Festival' chu Naga Heritage village, Kisama-ah December 1 aṭangin hman ṭan a ni dawn a, ni 10 chhung a awh ang. He hunah hian pastic lam thil reng reng hman khap a ni dawn.

Hornbill festival hman tur chung changah hian Kohim Deputy Commi­ssioner, Rajesh Soundararajan chuan thuchhuah siamin festival-ah plastic aṭanga siam bag (polythene), plate leh no reng reng hman phal a ni dawn lo tih a sawi. Kisam Complex leh Taders Road-a Night Bazaar Stalls mai bakah, High School junction velah pawh Hornbill lai hian plastic aṭanga siam thil reng reng hman khap a ni dawn. Heng lai vel hi 'Plastic Free Zone'-ah puan a nih thu, Kohima DC chuan a tarlang bawk.

Hornbill Festival laia sorkar agency, sumdawng pawl, enterprenuer mai bakah dawr siam turte chu he thuchhuah hi zawm vek turin an tibawk a ni.

Kisama hi Nagaland capital Kohima aṭanga km 12-a hlaa awm a ni a, kumin hian hnam hrang hrang artist 600 dawn an fuankhawm beisei thu, Art and Culture department thupuangtu chuan a sawi. Artist tel tur zingah hian Boney M chu a langsar ber an ni a, anni bakah hian ramchhunga milar eng emaw zat an tel dawn a ni.