Shillong-ah International Cherry Blossom Festival hmang ṭan

India International Cherry Blossom festival vawi hnihna chu Nilaini aṭng khan Shillong-ah hman ṭan a ni.

Festival hi hman ṭan ni tawh mah se, Cherry Blossom (Tlaizawng) var leh senno te chu an la par chiah lo a, botanist-te chuan hei hi boruak inthlak vang niin an sawi. Meghalaya-ah hian kumin­ah ruahtui a tlak rei avangin Cherry Blossom hi kumdang aiin a par har deuh a, hmun sang lam Upper Shillong leh Laitkor lamah erawh a par nasa tawh hle thung. Mithiamte chuan Cherry Blossom hi hmun sangah an par hma a, hmun hniam lamah erawh an par har deuh niin an sawi.

Festival hian ni li a awh dawn a, he hunah hian traditional, art leh culture lam kaihnawih pholan a ni a, khualzin mite a hip nasa leh zual hle a ni.

Forest and Environment Minis­ter Clement Marak chuan Japan, US, Switzerland leh South Korea lama Cherry Blossom festival hmang ṭhinte nen pawh inkungkaihna an neih thu sawiin, tun aṭanga kum rei loteah chuan khawvel hmun dang aṭang pawhin he festival-ah hian mi tam zawk an tel theih tawh a beisei thu a sawi.

Minister Marak chuan Megha­laya chu khawvela favang laia Cherry Blossom festival hmang hmasa ber an nih thu a sawi a, khawvel hmun dangah chuan March-June velah a par ṭhin laiin, Meghalaya-ah erawh chuan November-ah a par ṭhin thung a, hemi a nih avang hian he festival hi favang laiin an hmang thei bik tih a sawi.

Festival hi Meghalaya sorkar leh Institute of Bioresources and Sustainabel Development (IBSD) ṭangkawp buatsaih niin, khaulzin mite hipna tur a nih mai piah lamah bio-diversity venhimna lam hawia inzirtirna hun atan buatsaih ṭhin a ni.

Sorkar laipui Department of Biotechnology hnuaia awm IBSD chuan festival hi socio-economic lama hmasawnna tur a nih mai bakah, remna leh muanna chawisanna a nih thu sawiin, sustainable development lam pawh tinzawn a ni a, chu chu United Nations' sustainable development goal a nih thu an tarlang bawk.

INSD Director Dinabandhu Sahoo chuan khawvel hmun danga Cherry Blossom festival hmang ṭhintute chuan Japan tihdan an copy thu leh, Meghalaya erawh chuan an mahni tihdan ngeia he festival hi an hman thu a sawi.

Meghalya-ah hian tun din­hmunah Tlaizawng (Cherry Blossom) kung 5,000 vel zet phun a ni tawh a, Umiam - Shillong kawngpui dung, Ward's lake, New Shillong leh Mawphlang-ah te phun niin, 2022-ah chuan kung 20,000 phun hman an tum a ni.

Sahoo chuan 2022-ah chuan Shillong chu pink city a nih tawh dawn thu sawiin, Jaipur pink city nih dan nen erawh a danglam dawn hle a ni, a ti.