Assam leh Singapore-in inremna ziak

Assam sorkar leh Singapore sorkar chuan Thawhlehni khan thawhdunna tura inremna, Memorandum of Understanding (MoU) leh Terms of Reference (ToR) an ziak. North East Skills Centre (NESC) leh Greening Guwahati City project kalpuina turin he inremna hi an siam a ni.

He hunah hian Singapore Foreign External Minister Vivian Balakrishnan chu Singapore aiawhin a tel a, Assam leh Singa-pore hian thawhhona tur kawng hrang hrang an ruahman tih an tarlang.

Assam Chief Minister Sarbanada Sonowal chuan Assam sorkar in Singapore sorkar ṭanpuinain hna thawh tur tam zawk hmuh a nih theih nan thiamna lama kawng hrang hranga hmasawnna a awm dawn thu a sawi.

MoU leh ToR hi Assam sorkar hnuaia Skill, Employment leh Enterprenuership Department-te leh ITE Education Sevice, Singapore ten an ziak a, Guwahati city greening erawh hi chu Guwahati Metropolitan Development Authority leh Singapore Corporation Enterprise ten an ziak thung.

Singapore nen inremna an siam chu lawmawm a tih thu sawiin, Sarbananda Sonowal chuan Assam sorkar in mi rethei 78,500 tan 2016-19 chhungin Deen Dayal Upadhyaya Grameen Kaushalya Yojana (DDUJKY) hnuaiah skill development training a buatsaih tur thu a sawi.

Sonowal chuan NESC in kum tina zirlai 400 skilled human resource pool lama hmasawnna thlen thei tur training a pek tur thu a sawi bawk. 'Guwahati Open Space and Park Integrator (GOPI)' Network project hnuaiah Beuatification of Guwahati City project kalpui a nih tur thu a tarlang nghal a ni.

CM chuan hun lokal leh zel turah pawhSingapore nena thawh dunna ṭha neih zel a duh thu a tarlang a, Vivian Balakrishnan pawhin inremna an siam te hi Assam leh Singapore inkara inṭhian ṭhatna bul ṭanna a nih ngei a beisei thu a sawi ve bawk.

Assam CM chuan Singapore External Affairs Minister chu Assam leh Singapore direct flight a awm theih nana hma la turin a duh thu a sawi bawk a ni.